"Galbadrahtan asa otandyq dziýdoǵa úles qosqan qai kelimsek bar?"

Foto: Sports.kz

Rio-de-Janeiro 2016 Olimpiadasynyń qola júldegeri Galbadrah Otgontsetseg Qazaqstan azamattyǵynan bas tartatynyn aitty. Ol Terminal podkasyna bergen suhbatynda óz mindettemelerin oryndap, endi óz eline qaitqysy keletinin málimdegen. Sportshynyń bul sheshimin kóptegen qazaqstandyq kúiine qabyldady. "Qasqyrdy qansha tamaq berip baqsań da, ormanǵa qarap ulidy" sarynynda pikirler jazylyp, sportshynyń bul taǵdyry basqa da legionerlerge teris úlgi bolatynyn aitýda.

Sport jýrnalisi Aslan Qajenov dál Galbadrahtyń jaǵdaiynda halyqtyń shúiligetindei jaiy joq deidi. Óitkeni ol táýelsizdik jyldarynda elge kelgen 130-dan asa legionerlerdiń arasynda eleýli nátije kórsetken birden-bir sportshy.

"130-dan asa kelimsek arasynda nebir qyrtymbailar bar. Qazaqstan azamattyǵyn iemdenip alyp, ailyǵy men syiaqysyn qaltaǵa basyp, qazaq balalaryn jolyn jaýyp, dym nátije kórsetpei ketkeni qanshama. Kók pasportymyzǵa qol sozyp, elimizge esh úles qospai, tipti, elimizge esh tabanyn tigizbei júrgenderi qanshama. Onyń qasynda Galbadrah "potologyn" qoiyp berdi ǵoi", - dep jazdy Qajenov. 

Aslan Qajenov dziýdoshy qyzdyń jetken jetistikterine bólek toqtaldy.

"Mońǵol qyzy bizge 2015 jyly keldi. Sodan beri dziýdodan barlyq jarysta júlde ákeldi. Tarihi nátijeler tirkedi. Qazaqstan sonyń arqasynda alǵash ret olimpiadanyń jáne álem chempionatynyń jeńis tuǵyryna kóterildi. Ol eshteńe emes. Artynan Ábiba Ábýjaqynova men Aqmaral Naýatbek shyqty. Ekeýi de osy Galbadrahpen kúresip jetildi. Galbadrahpen kúresip shyńdaldy. Ony únemi suhbattarynda aitady. Qazaqtyń qos qyzy da qazir sol tarihi jeńis jolyn jalǵap, álemdik deńgeide keremet óner kórsetip júr. Legioner sportshy odan artyq ne berýi kerek? Galbadrahtan asa otandyq dziýdoǵa úles qosqan qai kelimsek bar?", - dep suraq qoiady jýrnalist. 

Jýrnalist Galbadrah Qazaqstanmen bailanysty úzbeitinin, Mońǵoliiada jasóspirimderdi daiyndap, shákirtterin Qazaqstanda ótetin jarystarǵa ákelip turatynyn aitty.

"Buǵan deiin Almatydaǵy jáne Tarazdaǵy týrnirlerge kelgenin bilemin. Joǵaryda aitqan ulttyq quramadaǵy qyzdarmen de bailanysta. Únemi aqyl-keńesin aityp jatady. Aitpaqshy, 2021 jyldan beri memleketten eshqandai ailyq ta, syiaqy da almaidy", - dep qosty Qajenov.

Aslan Qajenov Galbadrah Otgontsetsegty synaǵansha, Olimpiadaǵa shyǵýdan bas tartqan Rybakina men Pýtintsevaǵa, báriniń sońynda júgirip júretin Djepkemei men Kipkirýige, dopingpen laqtyryp ketken Rahimov pen basqalarǵa áńgime aityńdar dep keńes berdi.