Almatyda qala kúnine orai ótken Gakku Dauysy kontsertiniń kórermenderi 94 myńǵa jýyq gúldi taptap tastady, dep habarlaidy "Ult aqparat" shahar ákimdiginiń baspasóz qyzmetine silteme jasap.
«Astana» alańynda Gakku Dauysy 2022 festivali kezinde kórermender irgeles aýmaqtaǵy jasyl jelekterge aitarlyqtai ziian keltirgen.
"Ekologiia jáne qorshaǵan orta basqarmasynyń baǵalaýy boiynsha, shyǵyn somasy 13 mln teńgeden asty – birjyldyq, kópjyldyq butalar men gúlder, onyń ishinde qalanyń jaqyn mańdaǵy gúlzaryndaǵy raýshandar joiyldy. Barlyǵy 94 myńǵa jýyq gúl taptalyp ketken. Olar: 913 sharshy metr birjyldyq ósimdikter, 326 sharshy metr kópjyldyq ósimdikter jáne 117 sharshy metr raýshan gúlder" - delingen habarlamada.
Almaly aýdany ákimdiginiń málimeti boiynsha 13 oryndyq, 1 jaryq baǵanasy, granit ýrnasy men eki kameranyń negizi qiraǵan.
"Sondyqtan Almaty qalasynyń ákimdigi elimizdiń mádeni ortalyǵy bolyp tabylatyn megapolistiń turǵyndary men qonaqtarynan jasyl jelekterge jáne gúlderge uqypty qaraýdy, sondai-aq qalany abattandyrý men kógaldandyrýmen ainalysatyn qyzmetkerlerdiń eńbegin qurmetteýdi suraidy. Keltirilgen zalal qala ákimdiginiń kúshimen qalpyna keltiriledi-jańa ósimdikter qysqa merzimde otyrǵyzylady.
Kún saiyn qala aýmaǵyn sýarý men kógaldandyrý jumystaryna 300-ge jýyq maman men 80-nen asa arnaiy tehnika jumyldyrylady. Aǵymdaǵy jyly dekrativti kógaldandyrýdyń jalpy aýmaǵy 159 myń sharshy metrdi qurady, al gazon aýmaǵy - 26 myń sharshy metr" - deidi ákimdiktiń baspasóz qyzmeti.
