Burynǵy saiasatker Ǵabidolla Ábdirahymov ózine qatysty qylmystyq is qozǵaldy degen "qaýesetterge" pikir bildirdi, - dep habarlaidy Tengrinews.kz agenttigi.
Shymkenttiń burynǵy ákiminiń aitýynsha, oǵan quqyq qorǵaý organdarynan eshqandai habarlama kelmegen.
"Shynymdy aitsam, eshqandai is týraly habarym joq. Eshkim eshqaida shaqyrǵan joq (jaýap alýǵa - avt. esk.), maǵan eskertpedi. Áleýmettik jelide jazylǵandar bos sóz. Buǵan meniń esh qatysym joq. Bul ne úshin jasalǵanyn bilmeimin.
Ol adam (aryz jazǵan - avt.esk.) - qarapaiym kásipker, Qazaqstanda ondailar kóp. Men kóp kásipkerdi bilemin. Biraq ol adammen eshqandai qatysym bolǵan emes jáne joq. Onymen múldem bailanysta bolǵan joqpyn. Árine, ómir boiy, dálirek aitsaq, 22 jyl memlekettik qyzmette boldym. Men de basqalar siiaqty bul biznesmenderdi memlekettik qyzmetker retinde ǵana bilýim múmkin", - dedi Ábdirahymov.
Sondai-aq, ol aýyr qylmys jasady dep aiyptaý "óz aldyna qylmys ekenin" atap ótti.
"Nege adamdar mundaiǵa jol beredi. Bul aqparatty jariialaǵan Kozachkov myrza maǵan habarlaspady. Keshe Bas prokýratýra da aqparatty teriske shyǵardy. Biraq olar áli tynyshtalmai otyr. Maǵan bireý "tapsyrys" bergen siiaqty. Biraq munyń ne úshin jasalyp jatqanyn bilmeimin", - dep qosty eks-ákim.
Ábdirahymov qazir Nur-Sultanda turatynyn, kásipkerlik jáne "keibir jobalarymen" ainalysatynyn aitty.
Buǵan deiin Telegram-daǵy Kozachkov offside-arnasynda Ǵabidolla Ábdirahymov pen UQK-nyń burynǵy basshysy Kárim Másimovke qatysty "reiderlik" baby boiynsha qylmystyq is qozǵalǵany týraly aqparat paida boldy. Keiinirek paraqsha avtorlary aryz berýshi Forbes tizimindegi kásipker ekenin habarlady.
Sondai-aq, aryz tirkelip, Almaty Politsiia departamentine tapsyrylǵany aityldy. Is QR Qylmystyq kodeksiniń 190-baby 4-bóligi "Birneshe ret jasalǵan alaiaqtyq boiynsha" tergelip jatyr.
Almaty PD baspasóz qyzmeti is Qylmystyq kodekstiń 190-baby 4-bóligi boiynsha tergelip jatqanyn rastady. Aryzdanýshy K. esimdi azamat bolyp shyqty.
"Qylmystyq is boiynsha óndiristi Almaty qalalyq Politsiia departamentiniń tergeý bólimi júrgizip jatyr. Keshendi sharalary júrgizilip jatyr, onyń qorytyndysy boiynsha protsessýaldyq sheshim qabyldanady", - dedi PD baspasóz qyzmeti ókilderi.
