- Bas prokýratýrada kýágerler men jábirlenýshilerdiń quqyqtaryn qorǵaý máselesine arnalǵan jiyn ótken bolatyn. Osy jiynǵa qatysqan xalyqaralyq dárejedegi sýdia Ekaterina Trendafilova QazAqparat tilshisimen suhbatynda Mádeniet jáne sport ministri Arystanbek Muxamediuly men Eńlik Sydyqovanyń arasyndaǵy sot daýyna qatysty óz oiyn bildirdi.
Halyqaralyq sotta on jylǵa jýyq ýaqyt qyzmet etken sýdia Ekaterina Trendafilovanyń aitýynsha, álemdik tájiribe boiynsha ministr óz abyroiyn qorǵaý úshin sottyń kómegine júgine alady. Degenmen, ol óziniń qyzmet babyn paidalanyp, qarsy jaqqa qysym jasasa, qylmystyq istiń taǵy bir óndirisin ashý qajet.
«Endi, álemdik tájiribede san alýan mysaldar bar. Men Gaagada politsiia basshylary, vitse-prezident, tipti prezidentterdiń (Sýdan, Keniia basshylarynyń) isterin qaraǵanmyn. Negizi, qandai da bir sheneýnik óz jumysyna adal, isker azamat bolsa, bázbireýler ony taqtan taidyrýǵa tyrysýy ábden múmkin. Sondyqtan ol ministr qyzmetinde júrse de, ataq-abyroiyn saqtap qalý maqsatynda sotqa aryz bere alady. Bul jerde sottyń tóreligi mańyzdy. Sýdia eki adamǵa da teń qarasa, ádil sheshim shyǵarylady. Ol ministrden qoryqpaýy qajet. Al sotqa deiin ministr ákimshilik resýrstaryn paidalanyp, qysym kórsetetin bolsa, onda prokýrorlar sol úshin jańadan, basqa bir qylmystyq isti ashýy tiis», - dedi E.Trendafilova QazAqparat tilshisine bergen suxbatynda.
Aita keteiik, QR Mádeniet jáne sport ministri Arystanbek Muhamediuly óziniń abyroiyna nuqsan keltirgeni úshin ártis Eńlik Sydyqovany sotqa berdi. Ministrdiń qorǵaýshysy Iskander Álimbaevtyń aitýynsha, A.Muhamediulynyń sotqa aryz berýi - onyń zańdy quqyǵy. «Zańda ózine qatysty aiyptaýlardy teriske shyǵarý sharalary memlekettik qyzmetshiniń quqyǵy ǵana emes, mindeti retinde kórsetilgen. Quqyqtyq faktilerdiń sotpen aiqyndalatyny barshaǵa aian. Sydyqova taratqan aqparatty óz erkimen teriske shyǵarǵan joq, sol sebepti Muhamediulyna sotqa júginýge týra keldi», - deidi ol.
Alaida E.Sydyqovanyń qorǵaýshysy Gúlnár Jýaspaevanyń sózine qaraǵanda, qazirgi kezde ministr óz qyzmetin paidalanyp, ákimshilik resýrstary arqyly sot sheshimine áser etýge tyrysyp jatyr. «Osy daý-damai bastalǵanda men ertesinde birden aittym, eger ol ministr qyzmetinde Eńlikpen sottasatyn bolsa, onda sot ádiletsiz bolady. Qazirdiń ózinde ol qolynda bar ákimshilik resýrstaryn paidalanyp, sot sheshimin óz paidasyna sheshý maqsatynda Eńliktiń jigerin jasytýǵa tyrysyp jatyr. Búginde belgisiz bireýler oǵan qysym jasap, ministrdiń atyna aitqan sózderden bas tartsyn deidi», - dep atap kórsetti advokat.
