G-Global aiasynda aldaǵy ýaqytta Uly Jibek joly jahandyq syilyǵy beriledi. Bul týraly Eýraziialyq ekonomikalyq klýbtyń prezidenti, «G-Global. XXI ǵasyrdaǵy álem» Halyqaralyq kongresiniń halyqaralyq hatshylyǵynyń birinshi orynbasary Murat Qarymsaqov málim etti, dep habarlaidy QazAqparat.
«Bul bastama 2019 jyly 40 memlekettiń kóshbasshylary qatysqan Halyqaralyq forýmda qoldaý tapty. Sol sebepti keshegi qalalar merleriniń forýmynda Uly Jibek joly Jahandyq syilyǵyn bekitý jónindegi uiymdastyrý komitetin qurý bastamasyn kóterdik. Qalalar merleriniń kelesi halyqaralyq forýmyna deiin jahandyq syilyqty tabystaý sharasyn uiymdastyrý jolynda belsendi jumys júrgizýge shaqyramyz. Ol forým 2021 jyly Beijińde ótedi», - dedi Murat Qarymsaqov.
Nursultan Nazarbaevtyń bastamasymen qurylǵan G-Global aqparattyq-kommýnikatsiialyq platformasy álem halyqtarynyń biryńǵai jáne teń dárejeli dialogy arqyly álemdik birlestikterdiń jumysynyń tiimdi bolýyna jaily jaǵdai jasaidy, ártúrli zertteý júrgizedi. Forým jumysyna ǵalymdar men praktikterdiń, memlekettik, qoǵamdyq, halyqaralyq, aqparattyq salanyń ókilderi tartylǵan. Qazirgi tańda «G-Global» jobasy «Bir beldeý – bir jol» jobasynyń Bas seriktesiniń biri sanalady.
