Búgin fýtzaldan Qazaqstan quramasy 2020 jylǵy Álem chempionatynyń irikteý satysyndaǵy ekinshi kezdesýin Gollandiiaǵa qarsy ótkizdi, dep habarlaidy "Ult aqparat".
Qazaqstan quramasy búgingi oiyndy óte senimdi bastady. Qarsylastar qaqpasyna birinshi kezeńniń ózinde eki gol soǵyp ketti. Alǵashqy goldy 1-minýtta Dýglas Jýnior óziniń enshisine jazsa, 15-minýtta qazaqstandyq qaqpashy Igita mergendik tanytty. Esep 2:0.
Qazaqstandyq fýtzalshylar ekinshi kezeńde de ózderiniń myqty ekenin dáleldei tústi. Nátijesinde qarsylastar qaqpasyna taǵy da úsh gol engizdi. Qazaqstandyq qurama sapynan 21 jáne 35 minýttarda Dýglas Jýnior eki goldyń avtory atanyp, kezdesý barysynda het-trik jasady. Osylaisha qazaqstandyq fýtzalshylar qarsylasynan 5:0 esebimen basym tústi.
Budan buryn Qazaqstan quramasy Albaniiany 4:0 esebimen tize búktirgen edi. Osylaisha qazaqstandyq fýtzalshylar ázirge eki oiynda óz qaqpasyna birde-bir gol jibergen joq. Keshe Gollandiia men Rýmyniia quramalary 1:1 esebimen teń oinady.
Ázirge Qazaqstan eki oiynnan keiin 6 upai jinap, týrnir kestesinde jeke-dara kósh bastap tur. Sondai-aq, búgin atalmysh topta Rýmyniia men Albaniia quramalary sheberlik baiqasady.
Álem chempionaty finaldyq satysy 2020 jyldyń 12 qyrkúiek - 4 qazan aralyǵynda Litvanyń Vilniýs, Kaýnas jáne Klaipeda qalalarynda ótkiziledi. Onda jarys qojaiyny - Litvamen birge Eýropadan segiz qurama baq synaidy. Sondai-aq, Aziiadan - 5, Afrikadan - 3, Soltústik Amerikadan - 4, Ońtústik Amerikadan - 3, muhit aimaǵynan - 1 qurama qatysýǵa múmkindik alady.
