Fýtzaldan Qazaqstan quramasynyń elordada ótetin oqý-jattyǵý jiynyna shaqyrtý alǵan oiynshylar belgili boldy, - dep habarlaidy Qazaqstan fýtbol federatsiiasy.
Oqý-jattyǵý jiyny 23-31 qańtar aralyǵynda Nur-Sultan qalasynda ótkiziledi. Daiyndyq aiaqtalǵannan keiin qurama 2020 jylǵy álem chempionaty elitalyq satysyndaǵy oiyndardy ótkizý maqsatynda Chehiiaǵa attanady. Onda Rýmyniia, Sloveniia jáne Chehiiamen kúsh synasady. Jarystyń elitalyq satysy 2-5 aqpan aralyǵynda bolady.
Qazaqstan quramasynyń bas bapkeri Kaka oqý-jattyǵý jiynyna 16 oiynshyny shaqyrdy. Olardyń qatarynda qaqpashylar - Igita («Qairat»), Aleksandr Gýrov («Aiat»), Nurálem Baidýlla («Jetisý»); oiynshylar - Dáýren Nurǵojin, Shyńǵys Esenamanov, Birjan Orazov, Dáýren Tursaǵulov, Albert Aqbalyqov, Nursultan Piialy, Dýglas (barlyǵy - «Qairat»), Azat Valiýllin («Aiat»), Dinmuhamed Súleimenov, Arnold Knaýb (ekeýi - «Jetisý»), Qairat Imanalin («Aqtóbe»), Tainan, Leo (ekeýi - «Sporting», Portýgaliia) syndy oiynshylar bar.
Árbir topta jeńimpaz atanǵan tórt qurama týrnirdiń finaldyq satysyna tikelei joldama alady. Al óz tobynda ekinshi oryn alǵan tórt qurama qosymsha eki joldamany sarapqa salady.
