Fýtzaldan Qazaqstan quramasynyń 2022 jylǵy Eýropa chempionaty toptyq irikteý kezeńinde búgin, 2 naýryzda elordada Belarýspen kezdesedi, dep habarlaidy "Ult aqparat".
Atalǵan oiyn elorda ýaqytymen 19.20-da bastalyp, «Qazsport» telearnasynan tikelei efirde kórsetiledi.
Esterińizge sala ketelik, qazaqstandyq fýtzalshylar besinshi topqa tústi. Qarsylastary - Vengriia, Belarýs jáne Izrail quramalary.
Qazaqstandyq qurama alǵashqy oiynda óz alańynda Vengriiadan 5:0 esebimen basym tústi. Ekinshi kezdesýdi 28 qańtarda Izrailde ótkizý josparlanǵan. Degenmen atalǵan memlekette 26-31 qańtar aralyǵynda koronavirýstyń taralýyna jol bermeý maqsatynda halyqaralyq reister jabyldy. Sondyqtan atalǵan oiyndy keiinge shegerý jóninde sheshim qabyldandy.
Qos qurama arasyndaǵy eki kezdesý endi 9 jáne 11 sáýir kúnderi elordamyz - Nur-Sultan qalasyndaǵy «Jekpe-Jek» stadionynda bolady dep kútilýde.
Qazir týrnir kestesinde Qazaqstan, Vengriia jáne Belarýs quramalarynyń qorjynynda úsh-úsh upaidan bar. Eki qarsylasynan qazaqstandyq fýtzalshylardyń bir oiyny kem. Sońǵy oryndaǵy Izrail ázirge upaiǵa qol jetkizgen joq.
Belarýs fýtzalshylary biylǵy irikteý satysynda aldymen Izraildi syrt alańda 3:0 esebimen tize búktirdi. Odan keiin syrt alańda Vengriiaǵa 1:2 esebimen jol berdi.
Belarýs quramasy Eýropa chempionaty finaldyq satysynda 2010 jyly bir márte baq synady. Óz tobynda sońǵy oryndy mise tutty.
Aita ketelik, qazaqstandyq fýtzalshylar budan buryn Eýropa chempionaty finaldyq kezeńinde eki márte baq synady. 2016, 2018 jyldarda qola júlde aldy.
Eýropa chempionatynyń finaldyq satysy 2022 jyldyń 19 qańtar jáne 6 aqpan aralyǵynda Niderlandynyń Amsterdam jáne Groningen qalalarynda ótkiziledi.
