Foto: instagram.com/islamkhan_9
Fýtboldan Qazaqstan quramasynyń jartylai qorǵaýshysy Baýyrjan Islamhan resmi túrde Premer-ligada synǵa túsetin shymkenttik «Ordabasy» klýbynyń oiynshysy atandy, dep habarlaidy QazAqparat.
Shymkenttik klýb ony óz quramyna qosý úshin budan buryn oinaǵan Birikken Arab Ámirliginiń «Al-Ain» komandasynyń ruqsaty qajet edi. Degenmen bul máseleniń sheshimi biraz ýaqyt keshiktirildi. Nátijesinde atalǵan ruqsat alynyp, endi Baýyrjan komanda sapyna qosylmaq.
Aita keteiik, 2020 jyldyń qyrkúiek aiynda «Al-Ain» komandasy quramynda Aziia chempiondar ligasyndaǵy kezekti oiynynan keiin Islamhan tapsyrǵan doping-synamasy oń nátije kórsetken edi. Odan tyiym salynǵan metilgeksanamin tabylyp, eki jylǵa úlken fýtboldan shettetildi.
Ol ótken jyldyń qarashasynda Qazaqstan ulttyq quramasynyń Ózbekstan jáne Birikken Arab Ámirligi quramalarymen ótken joldastyq kezdesýlerine shaqyrtý aldy.
Baýyrjan Islamhan 1993 jyly 23 aqpanda Taraz qalasynda dúniege kelgen. 2011 jyldan beri qazaqstandyq «Taraz», «Astana», «Qairat», Reseidiń «Kýban», Birikken Arab Ámirliginiń «Al-Ain» klýbtary jáne el quramasynda 311 oiyn ótkizip, 74 goldyń avtory atandy. El quramasynda 46 oiynda 3 gol soqty.
