Búgin Qostanai qalasynda fýtboldan sýperkýbok oiyny ótkiziledi. Bul básekede elordalyq «Astana» jáne Qyzylordanyń «Qaisar» komandasy kezdesedi, dep habarlaidy QazAqparat tilshisi.
Búgingi kúnge deiin finalda toǵyz komanda baq synaǵan. Onyń ishinde «Astana» jeti márte finalda oinap, tórt márte (2011, 2015, 2018, 2019) kýbokty ielendi. Odan keiingi kezekte Almatynyń «Qairaty» 5 márte finalda baq synap, úsheýinde (2016, 2017) jeńimpaz atandy. Al «Aqtóbe» 2 (2008, 2010), «Elimai» (1995), «Ordabasy» (2012), «Shahter» (2013) komandalary bir-birden jeńimpaz tuǵyrynan kórindi. Sondai-aq, «Atyraý», «Vostok» jáne «Tobyl» komandalary sýperkýbokqa shyqqanymen birde-bir márte oǵan qol jetkize alǵan joq.
Aita keterligi, 2015 jyldan beri sýperkýbokta «Astana» men «Qairat» komandalary ózara tartysqa túsip keledi. Úsheýinde elordalyq klýbtyń mereii ústem bolsa, ekeýinde almatylyq komanda basym tústi. Endeshe, biyl sońǵy bes jylda alǵash ret «Qaisar» komandasy «Qairattyń» ornyn almastyryp otyr. Byltyr «Astana» qatarynan altynshy márte Qazaqstan chempiony ataǵyn jeńip alsa, «Qaisar» óz tarihynda ekinshi márte Qazaqstan kýbogyna ie boldy.
Elordalyq klýb biyl komanda quramyn burynǵydan da kúsheite tústi. Jylma-jyl eýrokýbok oiyndarynda el namysyn abyroimen qorǵap júrgen «Astana» óz quramyna tájiribeli oiynshylardy shaqyrdy. Olardyń qatarynda kiprlik Pieros Sotiriý, armeniialyq Tigran Barsegian, belarýstik Maks Ebong syndy fýtbolshylar bar. Qyzylordalyq komanda quramyna da kóptegen oiynshylar keldi. Biyl reseilik Aleksei Shýmskih, horvatiialyq Ivan Peshich, mozambiktik Artýro Rejinaldo, grýziialyq Elgýdja Rejinaldo «Qaisardyń» namysyn qorǵaidy.
Búgingi kezdesýde qostanailyq Anatolii Vishnichenko bas tóreshi qyzmetin atqarady. Oǵan qos qaptalda atyraýlyq Sergei Kalachev pen petropavldik Denis Vinogradov kómekshilik jasaidy. Al almatylyq Aidyn Raqymbaev pen petropavldyq Aleksandr Gaýzer qaqpa mańynda qyzmetterin atqarady.
Kezdesý elorda ýaqytymen 17.00-de bastalady. Oiyn «Habar» telearnasynan tikelei efirde kórsetiledi.
