Bolgariialyq 51 jastaǵy maman Stanimir Stoilov resmi túrde Qazaqstan quramasynyń bas bapkeri bolyp taǵaiyndaldy. Bul týraly Qazaqstan fýtbol federatsiiasynyń ókilderi búgin, 1 naýryzda Astana qalasynda ótken baspasóz jiyny kezinde jariialady.
Eske salaiyq, 22 qańtarda Qazaqstan quramasy Aleksandr Borodiýk qyzmetinen ketkennen keiin bas bapkersiz qalǵan edi. Reseilik maman Qazaqstan quramasymen bir jyldan az ýaqyt jumys istedi. Onyń bastamasymen bizdiń qurama segiz kezdesý ótkizip, alty ret jeńilip, bir ret teń oinady.
Al 8 qańtarda "Astana" fýtbol klýby Stoilovpen jańa kelisimshart jasaǵany týraly resmi habarlaǵan edi. Elordalyq klýbpen Stoilov eń birinshi kelisimshartyn 2014 jyly jasaǵan bolatyn. Sodan soń kelisimshart 2017 jyldyń 31 jeltoqsanyna deiin uzartyldy.
Bolgariialyq maman birinshi maýsymda-aq elordalyq klýbpen Qazaqstan Chempiony atandy. Odan keiin "Astana" bul bapkermen ishki birinshilikti úsh ret jeńip aldy. 2015 jyly "Astana" qazaqstandyq klýbtardyń arasynda birinshi bolyp Chempiondar ligasynyń toptyq kezeńine shyqty.
2016 jáne 2017 jyldary "Astana" Stoilovpen Eýropa ligasynyń toptyq kezeńinde oinady. Al biylǵy maýsymda "Astana" qazaqstandyq klýbtar arasynda Eýropa ligasynyń 1/16 finalyna birinshi bolyp shyqty. Bolgariialyq "Tema Sport" basylymynyń habarlaýynsha, elordalyq klýbpen jasaǵan jańa kelisimsharty boiynsha Stoilovtyń bir jyldyq jalaqysy 1,2 millionǵa deiin ósken.
