بولگارييالىق 51 جاستاعى مامان ستانيمير ستويلوۆ رەسمي تٷردە قازاقستان قۇراماسىنىڭ باس باپكەرٸ بولىپ تاعايىندالدى. بۇل تۋرالى قازاقستان فۋتبول فەدەراتسيياسىنىڭ ٶكٸلدەرٸ بٷگٸن, 1 ناۋرىزدا استانا قالاسىندا ٶتكەن باسپاسٶز جيىنى كەزٸندە جارييالادى.
ەسكە سالايىق, 22 قاڭتاردا قازاقستان قۇراماسى الەكساندر بوروديۋك قىزمەتٸنەن كەتكەننەن كەيٸن باس باپكەرسٸز قالعان ەدٸ. رەسەيلٸك مامان قازاقستان قۇراماسىمەن بٸر جىلدان از ۋاقىت جۇمىس ٸستەدٸ. ونىڭ باستاماسىمەن بٸزدٸڭ قۇراما سەگٸز كەزدەسۋ ٶتكٸزٸپ, التى رەت جەڭٸلٸپ, بٸر رەت تەڭ وينادى.
ال 8 قاڭتاردا "استانا" فۋتبول كلۋبى ستويلوۆپەن جاڭا كەلٸسٸمشارت جاساعانى تۋرالى رەسمي حابارلاعان ەدٸ. ەلوردالىق كلۋبپەن ستويلوۆ ەڭ بٸرٸنشٸ كەلٸسٸمشارتىن 2014 جىلى جاساعان بولاتىن. سودان سوڭ كەلٸسٸمشارت 2017 جىلدىڭ 31 جەلتوقسانىنا دەيٸن ۇزارتىلدى.
بولگارييالىق مامان بٸرٸنشٸ ماۋسىمدا-اق ەلوردالىق كلۋبپەن قازاقستان چەمپيونى اتاندى. ودان كەيٸن "استانا" بۇل باپكەرمەن ٸشكٸ بٸرٸنشٸلٸكتٸ ٷش رەت جەڭٸپ الدى. 2015 جىلى "استانا" قازاقستاندىق كلۋبتاردىڭ اراسىندا بٸرٸنشٸ بولىپ چەمپيوندار ليگاسىنىڭ توپتىق كەزەڭٸنە شىقتى.
2016 جەنە 2017 جىلدارى "استانا" ستويلوۆپەن ەۋروپا ليگاسىنىڭ توپتىق كەزەڭٸندە وينادى. ال بيىلعى ماۋسىمدا "استانا" قازاقستاندىق كلۋبتار اراسىندا ەۋروپا ليگاسىنىڭ 1/16 فينالىنا بٸرٸنشٸ بولىپ شىقتى. بولگارييالىق "تەما سپورت" باسىلىمىنىڭ حابارلاۋىنشا, ەلوردالىق كلۋبپەن جاساعان جاڭا كەلٸسٸمشارتى بويىنشا ستويلوۆتىڭ بٸر جىلدىق جالاقىسى 1,2 ميلليونعا دەيٸن ٶسكەن.
