Búgin fýtboldan Italiia kýbogynyń finaly ótti. Osylaisha atalǵan elde dop dodasy qaita jalǵasty, dep habarlaidy "Ult aqparat".
Finaldyq oiynda Neapoldiń «Napoli» jáne Týrinniń «Iýventýs» komandalary ózara sheberlik baiqasty. Jeńimpaz penalti tebý arqyly anyqtaldy. Bul joly «Napoli 4:2 esebimen utty. Osylaisha, komanda óz tarihynda altynshy márte kýbokty tóbesine kóterdi. Al «Iýventýs» budan buryn 13 márte kýbok iegeri atanǵan edi.
Endi, Italiiada 20 maýsymda A seriiasyndaǵy 27-týr oiyndary bastalady. Ol 23 maýsymǵa deiin ótkiziledi. Oiyndar jankúiersiz bolady. Chempionat 2 tamyzda máresine jetedi dep josparlanyp otyr.
Qazir týrnir kestesinde 26 oiynnan keiin 63 upaimen «Iýventýs» kósh bastap keledi. Odan keiingi oryndardaǵy «Latsionyń» - 62, «Interdiń» 52 upaiy bar.
Qazirge deiin Angliia, Germaniia, Ispaniia chempionattary qaita jalǵasty. Al Frantsiiada dop dodasy bitpesten «Pari Sen-Jermen» chempion bolyp sheshildi.
