14 maýsymda fýtboldan Eýropa chempionatynyń finaldyq satysyndaǵy toptyq kezeńde Polsha men Slovakiia quramalary kezdesti, dep habarlaidy "Ult aqparat".
Atalǵan eki komanda E tobynda synǵa túsedi. Qarsylastary – Ispaniia jáne Shvetsiia quramalary.
Eki qurama buǵan deiin segiz márte kezdesti. Onyń tórteýi slovakiialyq fýtbolshylar basymdyǵymen aiaqtalyp, úsheýinde poliaktar jeńse, bireýinde teń nátije tirkeldi. Dese de komandalar jeti jyldan astam ýaqyttan beri alańda jolyqqan joq.
Bul jolǵy kezdesýde slovakiialyq fýtbolshylardyń jeńiske umtylysy baiqalyp turdy. Nátijesinde 18-minýtta Polsha qaqpashysy Voitseh Shensnydyń óz qaqpasyna gol soǵyp alýyna májbúr etti.
Ekinshi kezeń bastalǵannan keiin poliak fýtbolshylary tarazy basyn teńestirdi. Ony 46-minýtta Karol Linetty óziniń enshisine jazdy.
Oiynnyń 62-minýtynda poliak fýtbolshysy Gjegoj Kryhoviak qyzyl qaǵaz alyp, alańnan qýyldy. Budan keiin 69-minýtta slovakiialyq Milan Shkriniar óziniń quramasyn qaitadan alǵa shyǵardy.
Osylaisha oiynda Slovakiia qarsylasynan 2:1 esebimen basym tústi.
Aita keteiik, atalǵan toptaǵy taǵy bir kezdesý búgin Ispaniia jáne Shvetsiia quramalary arasynda bolady. Oiyn elorda ýaqytymen 00.50-de bastalyp, «Qazaqstan» telearnasynan tikelei efirde kórsetiledi.
