17 naýryzda UEFA Chempiondar ligasy 1/4 finalyna shyqqan komandalar tolyqtai anyqtaldy, dep habarlaidy "Ult aqparat".
Cársenbide taǵy eki jup ózara kezdesti. Jeńimpazdary shirek finalǵa joldama aldy. Mundai múmkindikke «Chelsi» (Angliia) men «Bavariia» (Germaniia) klýbtary qol jetkizdi.
Alǵashqy jupta aǵylshyndyq ujym óz alańynda Ispaniianyń «Atletiko Madrid» komandasyn qabyldady. Bul kezdesýde alań ieleri 2:0 esebimen jeńiske jetti. «Chelsi» sapynan Hakim Ziesh – 34, Emerson 90-minýttarda mergendik tanytty. Eki komandanyń alǵashqy oiynynda londondyq klýb syrt alańda 2:0 esebimen basym túsken bolatyn.
«Bavariia» óz alańynda Italiianyń «Latsio» klýbymen sheberlik baiqasty. Bul oiynda nemis fýtbolshylary qarsylasyn 2:1 esebimen tize búktirdi. Olardyń qatarynan Robert Levandovski – 33, Erik Shýpo-Moting 73-minýttarda gol soqsa, 82-minýtta Marko Parolo esep aiyrmasyn qysqartty. Atalǵan juptyń alǵashqy kezdesýinde «Bavariia» 4:1 esebimen oisyrata jeńgen edi.
Nemis klýby óz tarihynda 19 márte shirek finalǵa joldama alyp otyr. Osylaisha Chempiondar ligasy rekordyn jańartty. Budan buryn Ispaniianyń «Barselona» komandasy 18 márte shirek finalǵa shyqqan bolatyn.
Esterińizge sala ketelik, týrnirdiń shirek finalyna «Real Madrid» (Ispaniia) «Manchester Siti» jáne «Liverpýl» (Angliia), «Pari Sen-Jermen» (Frantsiia), «Borýssiia Dortmýnd» (Germaniia), «Portý» (Portýgaliia) komandalary joldama aldy.
Atalǵan týrnirdiń 1/4 jáne 1/2 finaldyq oiyndarynyń jerebesi 19 naýryzda Shveitsariianyń Non qalasynda ótkiziledi.
Aita keteiik, 1/4 final 6-7 jáne 13-14 sáýir kúnderi bolady. Al jartylai final 27-28 sáýir jáne 4-5 mamyr kúnderine belgilengen.
Final 29 mamyrda Túrkiianyń Stambýl qalasyndaǵy «Atatúrik» olimpiadalyq stadionynda ótedi.
