28 naýryzda fýtboldan 2022 jylǵy álem chempionatyna irikteý satysynda elordada ótken Qazaqstan jáne Frantsiia kezdesýi aiaqtaldy, dep habarlaidy "Ult aqparat".
FIFA jariialaǵan sońǵy reitingte Frantsiia ekinshi orynda tur. Al Qazaqstan onda 122-orynda keledi.
Búgingi oiynda sońǵy álem chempiony - Frantsiia emin-erkin qimyl kórsetti. Alǵashqy minýttan shabýyl shebine kóbirek kóńil bóldi. Alań ieleri qaqpasy mańynda jii boi kórsetti. Osylaisha tizgindi qolǵa alýǵa tyrysty. Qazaqstandyqtar negizinen qorǵanysqa kóńil bólip, qarsylastar shabýylyna tótep berdi. Degenmen 19-minýtta frantsýzdyq shabýylshy Ýsman Dembele qazaqstandyq qurama qaqpasynan sańylaý tapty. Al 44-minýtta qazaqstandyq qorǵaýshy Sergei Malyi óz qaqpasyna gol soǵyp aldy.
Ekinshi kezeńde frantsýzdar shabýylǵa kóbirek kóńil bóldi. Dese de dittegen maqsatyna jete alǵan joq, Tipti, ataqty fýtbolshy Kilian Mbappe alań ieleri qaqpasyna belgilengen penaltiden múlt ketti. Onyń tepken soqqysyn qazaqstandyq qaqpashy Aleksandr Mokin syrtqa shyǵaryp úlgerdi.
Kezdesýde Frantsiia quramasy 2:0 esebimen jeńiske jetti. Osylaisha tórt upaimen týrnir kestesinde kósh basyna shyqty.
Sondai-aq, búgin atalǵan topta Ýkraina óz alańynda Finliandiiany qabyldaidy.
Endi Qazaqstan quramasy 31 naýryzda syrt alańda Ýkrainamen sheberlik baiqasady. Sol kúni syrt alańda Frantsiia Bosniia jáne Gertsogovinamen jasyl alańǵa shyǵady.
Aita keteiik, qazaqstandyq qurama irikteý satysynda D tobynda synǵa túsedi. Qarsylastary - Frantsiia, Ýkraina, Bosniia jáne Gertsogovina, Finliandiia.
