Qazaqstanda fýtbol komandalary shyǵyndarynyń biryńǵai normativterin belgileý orynsyz. Bul jaiynda Májilis depýtattarynyń resmi saýalyna jaýap bergen QR Premer-Ministri Asqar Mamin atap ótti, dep habarlaidy QazAqparat tilshisi.
«Qazirgi ýaqytta ulttyq fýtbol komandalary jergilikti biýdjet pen demeýshilik qarajat esebinen qarjylandyrylady. Bul rette óńirlerdiń ereksheligin, olardyń ekonomikalyq jai-kúiin eskere otyryp, jergilikti atqarýshy organdar, salalardyń damý basymdyqtary negizinde ózderiniń fýtbol klýbyn qarjylandyrý úshin jergilikti biýdjetten bólinetin qarajat mólsherin ózderi belgileidi», - delingen Úkimet basshysynyń jaýabynda.
Sonymen qatar ol demeýshilik qarajatty tartý óńirde iri ónerkásiptik nysandardyń, qalada júie quraýshy kásiporyndardyń bolýyna, biznes orta men investitsiialyq áleýetiniń damýyna bailanysty ekendigine nazar aýdartady. Mysaly, «Qairat» (Almaty), «Atyraý» (Atyraý), «Shahter» (Qaraǵandy) fýtbol klýbtary jergilikti biýdjetten bólingen qarajattan basqa, sondai-aq iri kásiporyndar men kompaniialardyń demeýshilik qarajaty esebinen qarjylandyrylady.
«Osyǵan bailanysty ekonomikalyq damýdaǵy óńirlik teńgerimsizdikti eskere otyryp, qazirgi ýaqytta fýtbol komandalary shyǵyndarynyń biryńǵai normativterin belgileý orynsyz. Bul rette fýtbol komandalaryn qarjylandyrý boiynsha tásilderdi odan ári jetildirý maqsatynda Mádeniet jáne sport ministrligi jergilikti atqarýshy organdarmen birlesip fýtbol salasyndaǵy sarapshylardyń qatysýymen, onyń ishinde oń halyqaralyq tájiribeni eskere otyryp, osy máseleni zertteitin bolady», - dedi Asqar Mamin.
Aita keteiik, osy jyldyń 23 qańtarynda Májilistiń bir top depýtaty sol kezdegi Premer-Ministr Baqytjan Saǵyntaevtyń atyna depýtattyq saýal joldap, fýtbol komandalary shyǵyndarynyń biryńǵai normativterin belgileý qajettigin atap kórsetken edi.
