Búgin fýtboldan 2021 jylǵy Eýropa birinshiligine irikteý kezeńi sheńberinde jastar arasynda kezekti oiyndar ótkizildi. Dúbirli dodada altynshy topta synǵa túsetin Qazaqstan jastary búgin elordada Izraildi qabyldady, dep habarlaidy "Ult aqparat".
Búgingi kúnge deiin altynshy topta qazaqstandyq fýtbolshylar úsh oiyn ótkizip úlgerdi. Aldymen syrt alańda Farer araldaryn 3:1 esebimen tize búktirse, odan keiin Chernogoriiadan 2:1 esebimen basym tústi. Al 6 qyrkúiekte óz alańynda Ispaniia quramasyna 0:1 esebimen jol berdi.
Qazirgi tańda Qazaqstan týrnir kestesinde úsh oiynnan keiin kósh basynda tur. Sondyqtan upai qoryn molaitý jarystyń finaldyq satysyna joldama alý múmkindigin ulǵaita túsedi.
Búgingi kezdesýde izraildik fýtbolshylar jyldam gol soǵyp ketti. Aldymen Izrail sapynan 2-minýtta Eilon Haim esep ashty. Al 22-minýtta tarazy basy teńesti. Ony qazaqstandyq qurama sapynan Viacheslav Shvyrev oryndady. Qarsylastarymyz oiynnyń 82-minýtynda taǵy alǵa shyqty. Bul gol Tomer Iýsefidiń enshisine jazyldy.
Aita keteiik, búgin sondai-aq, altynshy topta Soltústik Makedoniia men Farer araldary, Ispaniia men Chernogoriia kezdesedi.
Qazaqstan quramasy endi 15 qazanda syrt alańda Soltústik Makedoniia jastarymen oinaidy.
