بٷگٸن فۋتبولدان 2021 جىلعى ەۋروپا بٸرٸنشٸلٸگٸنە ٸرٸكتەۋ كەزەڭٸ شەڭبەرٸندە جاستار اراسىندا كەزەكتٸ ويىندار ٶتكٸزٸلدٸ. دٷبٸرلٸ دودادا التىنشى توپتا سىنعا تٷسەتٸن قازاقستان جاستارى بٷگٸن ەلوردادا يزرايلدٸ قابىلدادى, دەپ حابارلايدى "ۇلت اقپارات".
بٷگٸنگٸ كٷنگە دەيٸن التىنشى توپتا قازاقستاندىق فۋتبولشىلار ٷش ويىن ٶتكٸزٸپ ٷلگەردٸ. الدىمەن سىرت الاڭدا فارەر ارالدارىن 3:1 ەسەبٸمەن تٸزە بٷكتٸرسە, ودان كەيٸن چەرنوگورييادان 2:1 ەسەبٸمەن باسىم تٷستٸ. ال 6 قىركٷيەكتە ٶز الاڭىندا يسپانييا قۇراماسىنا 0:1 ەسەبٸمەن جول بەردٸ.
قازٸرگٸ تاڭدا قازاقستان تۋرنير كەستەسٸندە ٷش ويىننان كەيٸن كٶش باسىندا تۇر. سوندىقتان ۇپاي قورىن مولايتۋ جارىستىڭ فينالدىق ساتىسىنا جولداما الۋ مٷمكٸندٸگٸن ۇلعايتا تٷسەدٸ.
بٷگٸنگٸ كەزدەسۋدە يزرايلدٸك فۋتبولشىلار جىلدام گول سوعىپ كەتتٸ. الدىمەن يزرايل ساپىنان 2-مينۋتتا ەيلون حايم ەسەپ اشتى. ال 22-مينۋتتا تارازى باسى تەڭەستٸ. ونى قازاقستاندىق قۇراما ساپىنان ۆياچەسلاۆ شۆىرەۆ ورىندادى. قارسىلاستارىمىز ويىننىڭ 82-مينۋتىندا تاعى العا شىقتى. بۇل گول تومەر يۋسەفيدٸڭ ەنشٸسٸنە جازىلدى.
ايتا كەتەيٸك, بٷگٸن سونداي-اق, التىنشى توپتا سولتٷستٸك ماكەدونييا مەن فارەر ارالدارى, يسپانييا مەن چەرنوگورييا كەزدەسەدٸ.
قازاقستان قۇراماسى ەندٸ 15 قازاندا سىرت الاڭدا سولتٷستٸك ماكەدونييا جاستارىمەن وينايدى.
