Qazaqstan quramasynyń UEFA Ulttar ligasy 2020/2021 jyldardaǵy kezeńindegi oiyn kestesi jariialandy, dep habarlaidy "Ult aqparat".
Esterińizge sala ketelik, qazaqstandyq qurama S divizionynyń tórtinshi tobynda synǵa túsedi. qarsylastary - Litva, Belarýs jáne Albaniia quramalary .
Oiyn kestesi boiynsha qazaqstandyq fýtbolshylar alǵashqy kezdesýin 4 qyrkúiekte syrt alańda Litvamen bastap, odan keiin 7 qyrkúiekte óz alańynda Belarýs quramasynymen oinaidy. Al 10 qazanda Albaniia quramasyn qabyldap, 13 qazanda syrt alańda Belarýspen kezdesedi. Qazaqstan quramasy 12 qarashada syrt alańda Albaniiamen, 15 qarashada óz alańynda Litvamen jasyl alańǵa shyǵady.
Endi qarsylastarymyz jaiynda az-kem anyqtama bere ketelik. 2020 jyldyń 20 aqpanynda jariialanǵan FIFA-nyń sońǵy reitinginde Albaniia 66, Belarýs 87, Litva 131 orynda tur. Al Qazaqstan 118 orynda keledi.
Qazaqstandyq qurama atalmysh úsh qarsylasymen de buryn kezdesken. Fýtbolshylarymyz Albaniiamen 2005 jyly álem chempionatyna irikteý kezeńinde kezdesip, olardan 0:1, 1:2 esebimen jeńilip qaldy. Al Belarýspen 2009 jyly álem birinshiligine irikteý kezeńinde 1:5, 0:4 esebimen ese jiberip, 2011 jyly joldastyq kezdesýde 1:1 esebimen teń tústi. Al Litvamen 2014 jyly ótken joldastyq kezdesýde 1:1 esebine qanaǵat bildirdi.
Aita ketken jón, UEFA Ulttar ligasy alǵash ret 2018 jyly oinaldy. Bul joly Qazaqstan quramasy D divizionynda birinshi topta Grýziia, Latviia, Andorra quramalarymen kezdesip, óz tobynda ekinshi oryndy qanaǵat tutty. Al UEFA Ulttar ligasy 2018/2019 jyldardaǵy kezeńiniń finaldyq satysynda Portýgaliia chempion atandy.
