Almatylyq «Qairattyń» aldaǵy oqý-jattyǵý jiyny kezindegi qarsylastary belgili boldy, dep habarlaidy "Ult aqparat".
«Qairat» fýtbol klýbynyń baspasóz qyzmeti málim etkenindei, almatylyqtar jańa maýsymǵa daiyndyq barysynda barlyǵy úsh oqý-jattyǵý jiynyn ótkizbekshi.
Birinshi jiyn 3-17 qańtar aralyǵynda klýbtyń bazasynda bolmaqshy. Onda jattyǵý men baqylaý oiyndaryn ótkizý úshin barlyq jaǵdai jasalǵan.
Ekinshi jiyn Túrkiianyń Belek qalasynda 18-30 qańtar aralyǵynda ótedi. Osy kezeńde «Qairat» tórt birdei joldastyq kezdesý ótkizedi. Almatylyqtar Polshanyń chempionatynda alda kele jatqan «Legiiamen» eki márte jasyl alańǵa shyǵady. Aleksei Shpilevskiidiń shákirtteri sondai-aq Kievtiń «Dinamosymen» jáne Bolgariianyń «Lýdogorets» komandalarymen kezdesedi.
Belekte ótetin úshinshi jiynda «Qairat» sloveniialyq «Koper», máskeýlik «Dinamo», ýkrainalyq «Dnepr-1» jáne Resei premer-ligasynyń kóshbasshysy «Zenit» (Sankt-Peterbor) klýbtarymen sheberlik baiqasady. Besinshi qarsylas keiin anyqtalady.
Aita keteiik, budan buryn klýb basshylyǵy komandadan Qazaqstan ulttyq quramasynyń oiynshylary Baýyrjan Islamhan men Islambek Qýattyń ketetini jóninde málimdegen bolatyn. Sondai-aq onyń aldynda Georgii Jýkov, Marton Eppel, Sergei Politevich, Magomed Paragýlgov jáne Eldos Ahmetov syndy belgili fýtbolshylar «Qairatpen» qosh aitysqan edi. Bulardyń ornyn kimder basatyny ázirge belgisiz.
