Fýtboldan Qazaqstan chempionatynyń 13-týrynda Almatynyń «Qairaty» Taldyqorǵannyń «Jetisý» komandasyn utty, dep habarlaidy "Ult aqparat".
«Jas qyran» stadionynda ótken kezdesý almatylyqtar úshin ońaiǵa soqqan joq.
Birinshi taimda Dmitrii Ogaidyń shákirtteri 2:0 esebimen alǵa shyqty. Aldymen «Qairattyń» qorǵaýshysy Aibol Ábikenniń qateliginen keiin Pedro Eýjenio 7-minýtta esep ashty. On minýttan keiin Ǵafýrjan Súiimbaevtyń artqa bergen dobyn durys toqtata almaǵan Stas Pokatilov óz qaqpasyna gol ótkizip aldy.
Kóp uzamai 30-minýtta «Qairattyń» shabýylshysy Abat Aiymbetov esepti qysqartty.
Ekinshi taimda 50-minýtta Vagner Lav 11 metrlik aiyp dobyn qaqpadan áldeqaida joǵary tepti. Degenmen 57-minýtta A.Aiymbetov tarazy basyn teńestirdi. Ile-shala óz aiyp alańynda Aderinsola Eseolany shalyp qulatqan «Jetisý» qorǵaýshysy Meiram Sapanov ekinshi eskertýin alyp, alańnan qýyldy. Biraq A.Eseolanyń 11 metrlikten dobyn taldyqorǵandyq klýbtyń qaqpashysy Andrei Shabanov qaqshyp ala bildi. Biraq ol 76-minýtta Denis Poliakovtyń tepken dobyn qaitara almady.
Ekinshi taimda «Qairat» sapynda alǵash ret alańǵa shyqqan 19 jastaǵy Daniiar Úsenov 94-minýtta óziniń birinshi golyn soǵyp, esepti 4:2-ge jetkizdi.
Bul matchta óreskel qatelikke jol bergen Qazaqstan ulttyq quramasynyń qaqpashysy Stas Pokatilovty ekinshi taimda Danil Ýstimenko almastyrdy.
Oiynnyń ekinshi kezeńinde alańǵa shyqqan «Jetisý» fýtbolshysy Aslan Darabaev eki márte eskertý alyp, ol da qýylyp tyndy.
Osylaisha 32 upai jinaǵan Aleksei Shpilevskiidiń shákirtteri «Astanadan» 11 upaiǵa uzap ketti. Degenmen bul týrǵa qatyspaǵan elordalyqtardyń bir oiyny kem.
