فۋتبولدان قازاقستان چەمپيوناتىنىڭ 13-تۋرىندا الماتىنىڭ «قايراتى» تالدىقورعاننىڭ «جەتٸسۋ» كومانداسىن ۇتتى, دەپ حابارلايدى "ۇلت اقپارات".
«جاس قىران» ستاديونىندا ٶتكەن كەزدەسۋ الماتىلىقتار ٷشٸن وڭايعا سوققان جوق.
بٸرٸنشٸ تايمدا دميتريي وگايدىڭ شەكٸرتتەرٸ 2:0 ەسەبٸمەن العا شىقتى. الدىمەن «قايراتتىڭ» قورعاۋشىسى ايبول ەبٸكەننٸڭ قاتەلٸگٸنەن كەيٸن پەدرو ەۋجەنيو 7-مينۋتتا ەسەپ اشتى. ون مينۋتتان كەيٸن عافۋرجان سٷيٸمباەۆتىڭ ارتقا بەرگەن دوبىن دۇرىس توقتاتا الماعان ستاس پوكاتيلوۆ ٶز قاقپاسىنا گول ٶتكٸزٸپ الدى.
كٶپ ۇزاماي 30-مينۋتتا «قايراتتىڭ» شابۋىلشىسى ابات ايىمبەتوۆ ەسەپتٸ قىسقارتتى.
ەكٸنشٸ تايمدا 50-مينۋتتا ۆاگنەر لاۆ 11 مەترلٸك ايىپ دوبىن قاقپادان ەلدەقايدا جوعارى تەپتٸ. دەگەنمەن 57-مينۋتتا ا.ايىمبەتوۆ تارازى باسىن تەڭەستٸردٸ. ٸلە-شالا ٶز ايىپ الاڭىندا ادەرينسولا ەسەولانى شالىپ قۇلاتقان «جەتٸسۋ» قورعاۋشىسى مەيرام ساپانوۆ ەكٸنشٸ ەسكەرتۋٸن الىپ, الاڭنان قۋىلدى. بٸراق ا.ەسەولانىڭ 11 مەترلٸكتەن دوبىن تالدىقورعاندىق كلۋبتىڭ قاقپاشىسى اندرەي شابانوۆ قاقشىپ الا بٸلدٸ. بٸراق ول 76-مينۋتتا دەنيس پولياكوۆتىڭ تەپكەن دوبىن قايتارا المادى.
ەكٸنشٸ تايمدا «قايرات» ساپىندا العاش رەت الاڭعا شىققان 19 جاستاعى دانييار ٷسەنوۆ 94-مينۋتتا ٶزٸنٸڭ بٸرٸنشٸ گولىن سوعىپ, ەسەپتٸ 4:2-گە جەتكٸزدٸ.
بۇل ماتچتا ٶرەسكەل قاتەلٸككە جول بەرگەن قازاقستان ۇلتتىق قۇراماسىنىڭ قاقپاشىسى ستاس پوكاتيلوۆتى ەكٸنشٸ تايمدا دانيل ۋستيمەنكو الماستىردى.
ويىننىڭ ەكٸنشٸ كەزەڭٸندە الاڭعا شىققان «جەتٸسۋ» فۋتبولشىسى اسلان داراباەۆ ەكٸ مەرتە ەسكەرتۋ الىپ, ول دا قۋىلىپ تىندى.
وسىلايشا 32 ۇپاي جيناعان الەكسەي شپيلەۆسكييدٸڭ شەكٸرتتەرٸ «استانادان» 11 ۇپايعا ۇزاپ كەتتٸ. دەگەنمەن بۇل تۋرعا قاتىسپاعان ەلوردالىقتاردىڭ بٸر ويىنى كەم.
