Búgin fýtboldan 2020 jylǵy Eýropa chempionatynyń finaldyq kezeńi jalaýyn kóteredi, dep habarlaidy "Ult aqparat".
Dúbirli doda shymyldyǵy Túrkiia men Italiia quramalarynyń kezdesýimen túriledi. Oiyn Italiia astanasy Rim qalasyndaǵy Olimpiadalyq stadionda ótkiziledi. Bul matchta niderlandylyq Danni Makkeli bas qazy bolsa, oǵan otandastary Hessel Stegstra men Ian de Vris kómekshilik jasaidy. Qosalqy tóreshi - frantsiialyq Stefani Frappar.
Oiyn elorda ýaqytymen 00:50-de «Qazaqstan» jáne «Qazsport» telearnalarynan tikelei efirde kórsetiledi.
Buǵan deiin eki qurama 14 márte kezdesken. Onyń 10-ynda italiialyq fýtbolshylar basym tússe, 4-eýinde qos qurama teń nátijeni qanaǵat tutty. Áli kúnge deiin túrkiialyq fýtbolshylar atalǵan qarsylasynan basym túsip kórgen emes.
Eske salaiyq, qurlyqtyq doda on altynshy márte ótkizilip otyr. Kári qurlyqta 1960 jyly alǵashqy Eýropa birinshiligi uiymdastyryldy. Atalǵan dop dodasy 2020 jyly 12 maýsym men 12 shilde aralyǵynda ótkizilýi josparlanǵan. Byltyr álemdi jailaǵan koronavirýs infektsiasyna bailanysty ol bir jylǵa keiin shegerildi. Oiyndar dúbirli doda tarihynda tuńǵysh ret Eýropanyń 10 memleketinde ornalasqan 11 stadionda bolady. Bul dúbirli dodanyń 60 jyldyq mereitoiyna orai uiymdastyrylǵan.
Biylǵy birinshilikte barlyǵy 24 qurama synǵa túsedi. Árbir toptan úzdik eki komanda men kórsetkishi joǵary tórt qurama jarysty jalǵastyrýǵa múmkindik alady.
Quramalar tómendegi toptarǵa bólingen:
A toby: Ýels, Shveitsariia, Túrkiia, Italiia;
V toby: Finliandiia, Belgiia, Resei, Daniia;
S toby: Ýkraina, Avstriia, Soltústik Makedoniia, Niderlandy;
D toby: Horvatiia, Shotlandiia, Chehiia, Angliia;
E toby: Shvetsiia, Polsha, Slovakiia, Ispaniia;
F toby: Germaniia, Vengriia; Portýgaliia, Frantsiia;
