Qazaqstan ulttyq quramasynyń múshesi Baktier Zainýtdinov Resei chempionatynyń 18-týrynda máskeýlik TsSKA quramynda alańǵa shyqty, dep habarlaidy "Ult aqparat".
Máskeýlik klýb buǵan deiingi úsh týrda eki oiynda teń oinap, bireýinde jeńilis taýyp, týrnir kestesinde úshinshi orynǵa syrǵyp ketken bolatyn.
Sondyqtan Máskeý qalasynda «Ýral» komandasymen (Ekaterinbýrg) báseke TsSKA men onyń bapkeri Viktor Goncharenko úshin asa mańyzdy edi. Óitkeni Eýropa ligasynda da sátsiz óner kórsetkennen keiin V.Goncharenkoǵa ornynan bosap qalý qaýpi tóngen-di.
Oiynǵa birden aralasqan B.Zainýtdinov bul joly shabýyl shebinde kóbirek kórindi. 4-minýtta Ilia Shkýrinniń pasynan keiin Baktier tepken dopty «Ýraldyń» qaqpashysy Ilia Pomazýn qaqshyp aldy. Sálden keiin qazaqstandyq fýtbolshy tártip buzyp, eskertý alyp qaldy. Endi ol 17 jeltoqsanda Rostovta óziniń burynǵy komandasymen ótetin matchqa qatyspaidy.
Degenmen kóp uzamai B.Zainýtdinov nátijeli oiynymen kózge tústi. 12-minýtta oń qaptaldan Baktierdiń áýeletip, ádemi bergen pasynan keiin I.Shkýrin esep ashty – 1:0.
Birinshi taimda qonaqtar da qarap qalmady. 31-minýtta Andrei Egorychev tarazy basyn teńestirip ketti.
Ekinshi kezeń «Ýral» úshin sátsiz bastaldy. Tájiribeli shabýylshy Pavel Pogrebniak eskertý alǵannan keiin qarap turmai, tóreshige doq kórsetemin dep, alańnan qýyldy. Ol az bolǵandai, qorǵaýshy Aleksei Gerasimovtyń qolyna dop tiip, 11 metrlik aiyp dobyn 61-minýtta Nikola Vlashich dál oryndady – 2:1. 63-minýtta B.Zainýtdinovty Fedor Chalov almastyrdy.
Alań ieleri bir fýtbolshysy kem «Ýraldy» asa qinalmai jeńetindei kóringen. Alaida 89-minýtta Igor Kalinin baspen toǵyzdyqty dál kózdedi. Ol matchtyń úzdik oiynshysy atandy.
Kezdesý sońynda dóreki oinaǵan I.Shkýringe de qyzyl qaǵaz kórsetildi.
Osylaisha match 2:2 esebimen teń aiaqtaldy. Sóitip óz alańynda qarsylasyn uta almai, múmkindigin taǵy da múlt jibergen TsSKA 34 upaimen úshinshi orynda qaldy. Máskeýlikter túrli týrnirde jeti oiyn qatarynan jeńiske jete almai keledi.
Mamandar B.Zainýtdinovtyń birinshi taimdaǵy ónerin joǵary baǵalady. Jalpy, biyl máskeýlik klýbqa alynǵan oiynshylardyń ishinde transferlik quny jóninen eń arzany bola tursa da, 22 jastaǵy Baktier ámbebap fýtbolshyǵa ainalyp keledi. Buryn jartylai qorǵanys shebinde ǵana oiqastaǵan ony TsSKA bapkerleri birese sol, birese oń qaptaldaǵy qorǵanysta synap kórdi.
