قازاقستان ۇلتتىق قۇراماسىنىڭ مٷشەسٸ باكتيەر زاينۋتدينوۆ رەسەي چەمپيوناتىنىڭ 18-تۋرىندا مەسكەۋلٸك تسسكا قۇرامىندا الاڭعا شىقتى, دەپ حابارلايدى "ۇلت اقپارات".
مەسكەۋلٸك كلۋب بۇعان دەيٸنگٸ ٷش تۋردا ەكٸ ويىندا تەڭ ويناپ, بٸرەۋٸندە جەڭٸلٸس تاۋىپ, تۋرنير كەستەسٸندە ٷشٸنشٸ ورىنعا سىرعىپ كەتكەن بولاتىن.
سوندىقتان مەسكەۋ قالاسىندا «ۋرال» كومانداسىمەن (ەكاتەرينبۋرگ) بەسەكە تسسكا مەن ونىڭ باپكەرٸ ۆيكتور گونچارەنكو ٷشٸن اسا ماڭىزدى ەدٸ. ٶيتكەنٸ ەۋروپا ليگاسىندا دا سەتسٸز ٶنەر كٶرسەتكەننەن كەيٸن ۆ.گونچارەنكوعا ورنىنان بوساپ قالۋ قاۋپٸ تٶنگەن-دٸ.
ويىنعا بٸردەن ارالاسقان ب.زاينۋتدينوۆ بۇل جولى شابۋىل شەبٸندە كٶبٸرەك كٶرٸندٸ. 4-مينۋتتا يليا شكۋريننٸڭ پاسىنان كەيٸن باكتيەر تەپكەن دوپتى «ۋرالدىڭ» قاقپاشىسى يليا پومازۋن قاقشىپ الدى. سەلدەن كەيٸن قازاقستاندىق فۋتبولشى تەرتٸپ بۇزىپ, ەسكەرتۋ الىپ قالدى. ەندٸ ول 17 جەلتوقساندا روستوۆتا ٶزٸنٸڭ بۇرىنعى كومانداسىمەن ٶتەتٸن ماتچقا قاتىسپايدى.
دەگەنمەن كٶپ ۇزاماي ب.زاينۋتدينوۆ نەتيجەلٸ ويىنىمەن كٶزگە تٷستٸ. 12-مينۋتتا وڭ قاپتالدان باكتيەردٸڭ ەۋەلەتٸپ, ەدەمٸ بەرگەن پاسىنان كەيٸن ي.شكۋرين ەسەپ اشتى – 1:0.
بٸرٸنشٸ تايمدا قوناقتار دا قاراپ قالمادى. 31-مينۋتتا اندرەي ەگورىچەۆ تارازى باسىن تەڭەستٸرٸپ كەتتٸ.
ەكٸنشٸ كەزەڭ «ۋرال» ٷشٸن سەتسٸز باستالدى. تەجٸريبەلٸ شابۋىلشى پاۆەل پوگرەبنياك ەسكەرتۋ العاننان كەيٸن قاراپ تۇرماي, تٶرەشٸگە دوق كٶرسەتەمٸن دەپ, الاڭنان قۋىلدى. ول از بولعانداي, قورعاۋشى الەكسەي گەراسيموۆتىڭ قولىنا دوپ تيٸپ, 11 مەترلٸك ايىپ دوبىن 61-مينۋتتا نيكولا ۆلاشيچ دەل ورىندادى – 2:1. 63-مينۋتتا ب.زاينۋتدينوۆتى فەدور چالوۆ الماستىردى.
الاڭ يەلەرٸ بٸر فۋتبولشىسى كەم «ۋرالدى» اسا قينالماي جەڭەتٸندەي كٶرٸنگەن. الايدا 89-مينۋتتا يگور كالينين باسپەن توعىزدىقتى دەل كٶزدەدٸ. ول ماتچتىڭ ٷزدٸك ويىنشىسى اتاندى.
كەزدەسۋ سوڭىندا دٶرەكٸ ويناعان ي.شكۋرينگە دە قىزىل قاعاز كٶرسەتٸلدٸ.
وسىلايشا ماتچ 2:2 ەسەبٸمەن تەڭ اياقتالدى. سٶيتٸپ ٶز الاڭىندا قارسىلاسىن ۇتا الماي, مٷمكٸندٸگٸن تاعى دا مٷلت جٸبەرگەن تسسكا 34 ۇپايمەن ٷشٸنشٸ ورىندا قالدى. مەسكەۋلٸكتەر تٷرلٸ تۋرنيردە جەتٸ ويىن قاتارىنان جەڭٸسكە جەتە الماي كەلەدٸ.
ماماندار ب.زاينۋتدينوۆتىڭ بٸرٸنشٸ تايمداعى ٶنەرٸن جوعارى باعالادى. جالپى, بيىل مەسكەۋلٸك كلۋبقا الىنعان ويىنشىلاردىڭ ٸشٸندە ترانسفەرلٸك قۇنى جٶنٸنەن ەڭ ارزانى بولا تۇرسا دا, 22 جاستاعى باكتيەر ەمبەباپ فۋتبولشىعا اينالىپ كەلەدٸ. بۇرىن جارتىلاي قورعانىس شەبٸندە عانا ويقاستاعان ونى تسسكا باپكەرلەرٸ بٸرەسە سول, بٸرەسە وڭ قاپتالداعى قورعانىستا سىناپ كٶردٸ.
