Búgin fýtboldan Premer-liga komandalary arasynda Qazaqstan chempionatynyń 20-týrynda elordalyq «Astana» qyzylordalyq «Qaisardan» basym tústi, dep habarlaidy "Ult aqparat".
Esterińizge sala ketelik, budan buryn «Astana» qatarynan tórt oiynda jeńiske jete almai kele jatqan bolatyn. Sol sátsizdikter seriiasyn búgin toqtatty.
Oiynnyń 25-minýtynda elordalyq Marin Tomasov esep ashsa, oǵan 31-minýtta qyzylordalyq Maksim Fedin bir golmen jaýap qaiyrdy.
Ekinshi kezeńde Pieros Sotiriý eki márte mergendigimen kózge tústi. Aldymen 61-minýtta gol soqsa, 73-minýtta esepti ústemelei tústi. Osylaisha «Astana» qarsylasyn 3:1 esebimen tize búktirdi.
Búgingi jeńisinen keiin elordalyq klýb 27 upaimen úshinshi orynǵa kóterildi.
Atalǵan týrda búgin taǵy tórt oiyn ótkiziledi. Qazir birinshi kezeńnen keiin «Qyzyljar» men «Ordabasy» 0:0 esebimen teń túsip jatsa, «Taraz» «Kaspiiden» 0:1 esebimen jeńilip jatyr. Al «Shahter» men «Jetisý», «Oqjetpes» pen «Tobyl» arasyndaǵy oiyndar elorda ýaqytymen 18:00-de bastalady.
