Búgin elordalyq «Astana» Túrkiiadaǵy oqý-jattyǵý jiyny barysynda Reseidiń «Arsenal» (Týla) komandasymen joldastyq kezdesý ótkizdi, dep habarlaidy "Ult aqparat".
Oiyn 1:1 esebimen aiaqtaldy. Kezdesýdiń jetinshi minýtynda «Astana» sapyna jaqynda qosylǵan kiprlik fýtbolshy Pieros islandiialyq jartylai qorǵaýshy Rýnar Mar Sigýronssonǵa ádemi pas shyǵaryp berdi. Oǵan reseilik komanda 28-minýtta jaýap golyn soǵyp ketti.
«Arsenal» klýby qazir Resei Premer-ligasynda qysqy úzilisten keiin 19 oiynda 25 upai jinap, týrnir kestesinde altynshy orynda keledi. Al «Astana» 29 aqpanda Qostanai qalasynda Qazaqstan sýperkýbogynda Qyzylordanyń «Qaisar» komandasymen kezdesedi.
Budan buryn «Qairat» Reseidiń «Rýbin» klýbynan basym túskenin habarlaǵan edik.
