QR Qoǵamdyq damý ministrligi oqý-bilimge qulyqsyz ári naqty ustanymy joq jastardyń birneshe tobyn anyqtady. Olardyń ishinde frilanserler de bar, dep xabarlaidy QazAqparat tilshisi.
Ministr Darxan Káletaevtyń aitýynsha, birinshi topqa áleýmettik qoldaý júiesimen qamtylmaǵandar jáne ata-anasynyń qamqorlyǵynda otyrǵandar kiredi.
«Saiasi jaǵynan bul jastar memleketke niettes, alaida jergilikti deńgeide syni kózqarasta bolýy múmkin. Jas ólshemi boiynsha kishi top - 18-22 jastyń aralyǵy, orta top - 22-24 jas aralyǵy, eresekter toby - 25-29 jas aralyǵy. Jalpy, jumyspen, oqýmen qamtylǵan jastardyń jeti tobyn ataýǵa bolady. Birinshi toby - asyraýda otyrǵandar. Olardyń bilimi men tájiribesi bar. Biraq oqý men jumysty jalǵastyrýǵa yntasy joq. Ekinshi top - jas áielder, jas balalary bar, jalǵyzbasty analar, sonyń ishinde erte ana bolǵandar. Úshinshi top - frilanserler, erkin aqsha tabýdy, júiesiz jumys pen kóleńkeli sektordy artyq sanaityn kezdeisoq tabyspen kún kóretinder. Tórtinshi top - aýyl jastary. Olar - biliktiligi men tájiribesi joq, qosalqy sharýashylyqqa tartylǵandar. Besinshi top - múmkindigi shekteýli jandar. Altynshy top - áleýmettik jaǵdaiy tómen otbasynan shyqqandar. Olarda oqýdy jalǵastyrýǵa niet bar. Biraq múmkindigi joq. Al jetinshi toby - túrmeden shyqqandar, esirtki men ishimdikke táýeldi jastar», - dedi D.Káletaev Úkimettiń búgingi otyrysynda.
Aita keteiik, búgin QR Qoǵamdyq damý ministri Darxan Káletaev jumyssyz jastar máselesin kóterdi. Onyń aitýynsha, memlekettik basqarý salasynda oqý-bilimge qulyqsyz, saiasi jáne azamattyq belsendiligi tómen, jaýapkershikti óz moinyna alýǵa nietsiz jastarǵa qatysty naqty bir termin bar.
«Qazaq tilinde bul termin aǵylshyn nusqasyn qaitalap otyr. Alaida qazaq paiymyna salatyn bolsaq, bul topty «nietsiz» dep bir sózben ataýǵa bolatyn shyǵar. Ondai minez-qulyq, kóp jaǵdaida, jastardyń qoǵamnan qashýyna ákelip soqtyrady. Olar áleýmettik ortada ózderin kereksiz den sanaidy. Sýitsid pen deviatsiia siiaqty problemalardyń barlyǵy osylan týyndaidy. Otbasy qundylyqtary buzylady», - dep atap kórsetti D.Káletaev.
