Frilanserler, qos qyzmette isteitinder jáne eńbek kelisimsharty barlar mindetti zeinetaqy jarnasyn tóleýden bosatylady, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
2018 jyldyń 27 jeltoqsanyndaǵy QR «Qazaqstan Respýblikasynyń halyqty jumyspen qamtý máseleleri boiynsha birqatar zań aktilerine ózgerister men tolyqtyrýlar engizý týraly» Zańyna engizilgen túzetýler mindetti zeinetaqy jarnasyn tóleý protsedýralaryn ońtailandyrýǵa baǵyttalǵan.
Engizilgen ózgerister osy sanattaǵy jumys isteitin azamattardyń, depýtattyq korpýs ókilderiniń, birqatar zańdy tulǵalardyń, «frilanser» qyzmetin paidalanyp otyrǵandardyń basym bóliginiń pikirin nazarǵa alyp otyr.
Qabyldanǵan zańnamalyq ózgeristerdi júzege asyrý úshin 2019 jyldyń birinshi toqsanynda tiisti erejelerge ózgerister engiziletin bolady. Ózgerister qabyldanǵan sátten bastap, jaldamaly jumysshy retinde qos qyzmette júrgen azamattar (iaǵni jeke eńbek kelisim-shartyn jasaý aiasynda) jáne azamattyq-quqyqtyq negizdegi kelisim boiynsha jumys istep nemese qyzmet kórsetip júrgender, tabys kózinen mindetti zeinetaqy jarnasyn tóleýden bosatylady.
Azamattyq-quqyqtyq negizde kelisimshart boiynsha jumys istep júrgen jeke tulǵalar úshin mindetti zeinetaqy jarnasyn zańdy tulǵalar, jeke kásipkerlik jáne jeke tájiribemen ainalysatyn tulǵalar tóleitin bolady. Olar salyq agenti retinde «frilanserler» úshin jeke tabys salyǵyn eseptep, tóleidi.
Sondai-aq azamattyq-quqyqtyq kelisimshart boiynsha jumys istep jatqandar, jeke tulǵalarmen kelisimge otyrǵan jeke tulǵalardyń jinaqtaýshy zeinetaqy júiesine qatysý quqyǵy saqtalady. Olar óz betinshe de mindetti zeinetaqy jarnasyn tólei alady.
