Frantsiianyń burynǵy prezidenti Nikolia Sarkozi sybailas jemqorlyq jáne tergeýge zańsyz qysym kórsetý isi boiynsha sotqa tartylmaq, dep habarlaidy France 24 arnasy.
Sarkozidiń soty jýyq ailarda bolýy múmkin. Bul týraly 19 maýsymda AFP agenttigi habarlady.
Frantsiianyń Kassatsiialyq soty Sarkozi isi boiynsha sot talqylaýyn ótkizýge qaýly qabyldady. Sarkozimen qatar, onyń advokaty Terri Hertsog pen burynǵy sýdia Jilber Aziberden de sotta jaýap alynady.
Sarkozi 2007 jylǵy prezidenttik kampaniiasy úshin L'Oreal murageri Lilian Bettankýrden zańsyz tólemder qabyldady degen aiyptaýmen tekseris júrgizgen tergeýshiler Hertsog pen Aziberdiń telefon suhbatyn jazyp alǵan.
Tergeý barysynda Sarkozi men Hertsog jalǵan esimdermen tirkelgen uialy telefondardy qoldanǵan. Tergeýshiler Sarkozidiń ózi Pol Vismýt degen búrkenshik atpen sóileskenin aityp otyr.
France 24 saiasi redaktory Mark Perelmannyń pikirinshe, eger Sarkozige taǵylǵan aiyptaýlardyń barlyǵy dálelin tapsa, ol «10 jylǵa deiingi merzimge jabylýy» múmkin.
2014 jyly Sarkozi tergeýdiń basynda politsiia qamaýǵa alǵan Frantsiianyń alǵashqy prezidenti bolǵan. Alaida, ol Frantsiianyń sot jaýapqa tartqan alǵashqy eks-prezidenti emes. Oǵan deiin, Jak Shirak ta 2011 jyly jaýapqa tartylyp, Parijdiń meri bolǵan tusta memleket qarajattaryn ońdy-soldy jumsaǵany úshin eki jylǵa shartty túrde sottalǵan. Al eger Sarkozidiń tergeýi jalǵasa berse, ol Frantsiianyń prezident kezindegi áreketteri úshin sottalǵan alǵashqy eks-prezidenti bolýy múmkin.
Sarkozige qatysty, ol 2012 jyly Frantsiia Prezidenti laýazymyna qaita sailanýǵa bergen ótinimi sátsiz bolǵaly sot tártibinde tergeý júrip jatyr.
Ótken aida Joǵarǵy sot 2012 jylǵy kampaniiany zańsyz qarjylandyrdy degen aiyptaý boiynsha ekinshi ret sot talqylaýynan sytylyp shyǵý úshin bergen apelliatsiiasyn qaitardy.
Aiyptaýshylar Sarkozi qaita sailaný úshin jalǵan esepshottar arqyly 43 million eýroǵa jýyq qarajat jumsaǵanyn aitady. Bul - zańmen belgilengen 22,5 million eýrodan eki esedei kóp.
