Frantsiia densaýlyq saqtaý ministri Olive Veran seisenbi kúni Qytaidaǵy koronavirýs indetiniń búkil álemge taralý «qaýpi» týraly aitty, dep habarlaidy Reuters agenttigi.
«Bul - jumys barysyndaǵy boljamym, sondai-aq is júzinde de qaýip bar», - dedi Veran France Info radiostansasynyń efirinde.
Ol Frantsiianyń barlyq múmkindikterdi paidalanýǵa daiyn ekenin, al densaýlyq saqtaý júiesiniń aitarlyqtai senimdi jáne jaqsy jabdyqtalǵanyn atap ótti.
Ministr virýs juqtyrǵan tórt naýqastyń Frantsiia aýrýhanasynda jatqanyn atap ótti.
80 jastaǵy qytailyq týrist Frantsiiada ótken aptada koronavirýstan qaitys boldy. Bul Eýropadaǵy alǵashqy jaǵdai boldy. Qytaida qaitys bolǵandar sany 1 868 adamǵa ósti.
Dúniejúzilik densaýlyq saqtaý uiymynyń (DDSU) málimetinshe, pandemiia – álemdik aýqymdaǵy jańa aýrýdyń taralýy.
Dúisenbi kúni DDSU tótenshe jaǵdailar jónindegi baǵdarlamalardyń atqarýshy direktory Maikl Raian koronavirýsty pandemiiaǵa jatqyza ma degen suraqqa bylai dep jaýap berdi: «Virýstyń Qytai aýmaǵynan tys berilip jatqanyn baiqap turmyz ba degen suraqqa jaýap berýimiz kerek. Qazirgi ýaqytta mundai jaǵdai bolyp jatqan joq».
