Frantsiia senaty jeksenbi kúni koronavirýspen kúres týraly zań jobasyn maquldady. Keiingi birneshe kúnde elde osy qujatqa bailanysty jappai narazylyq tutanǵan, dep habarlaidy Azattyq.
Qujat meditsina qyzmetkerlerin vaktsina saldyrýǵa mindetteidi, sonymen birge sanitarlyq ruqsat qaǵazynyń "ókiletin" keńeitedi. Senatty baqylaityn oppozitsiia ókilderi zań jobasyna erejelerdi birshama jumsartatyn túzetýler engizdi. Atap aitqanda, sanitarlyq ruqsat qaǵazynyń kúshine ený merzimi 15 qyrkúiekke deiin shegerildi. Senatorlardyń pikirinshe, dámhana men meiramhanalardyń syrttaǵy oryndaryna otyrý úshin jáne sýpermarketterge kirý úshin ruqsat qaǵazdyń qajeti joq. Kámelet jasqa tolmaǵandardyń da sanitarlyq ruqsat qaǵazyn alýy shart emes.
Prezident Emmanýel Makronnyń jaqtastary baqylaityn parlamenttiń tómengi palatasy – Ulttyq jiyn zań jobasyn endi qaita qarastyrady. Olar senatorlardyń pikirimen kelispei, qatań erejelerdi qalpyna keltirýi múmkin.
Sanitarlyq ruqsat qaǵazynda vaktsina, PTR test nemese antidene jóninde aqparat bolady. Úkimet pen zań shyǵarýshy organnyń pikirinshe, Frantsiia turǵyndary bul qujatsyz qoǵamdyq oryndarǵa bara almaýy tiis. Qazirdiń ózinde elde kinoteatr, teatr, mýzeilerge kirý úshin osyndai ruqsat qaǵazy qajet.
Keiingi kezde Frantsiiada koronavirýs juqtyrǵandar kóbeidi. Bilik vaktsinalaýdy jyldamdatýǵa kúsh salyp jatyr.
Áleýmettik saýalnama frantsýzdardyń basym bóliginiń shekteý sharalaryn qoldaitynyn kórsetkenmen biliktiń usynystary qoǵamda ótkir reaktsiia týǵyzdy. Senbi kúni Parij ben ózge qalalarda sanitarlyq ruqsat qaǵazy men mindetti vaktsinaǵa qarsy narazylyq ótti. Oǵan resmi málimet boiynsha, 160 myńnan astam adam qatysty.
Parijde narazylar politsiiamen qaqtyǵysyp qaldy. Prezident Makron narazylyqqa qatysýshylardy ózimshildik kórsetti, jaýapsyz qylyq tanytty dep ótkir aiyptady. Ol vaktsinany indetpen kúresýdiń eń tiimdi amaly dep atady.
Eýropanyń ózge qalalarynda da shekteý sharalaryna qarsy azamattar senbi kúni narazylyqqa shyqty.
