Jeksenbi, 24 sáýirde Frantsiiada ótken prezident sailaýynyń ekinshi kezeńinde Emmanýel Makron jeńiske jetti. Osylaisha Makron sońǵy 20 jylda qaita sailanǵan alǵash prezident atandy. Onyń qarsylasy "Ulttyq birlik" ásire ońshyl kúshteriniń ókili Marin Le Pen óziniń jeńilgenin moiyndap úlgerdi.
Frantsiianyń iri qalalarynda sailaý ýchaskeleri jergilikti ýaqytpen 20:00 (Nur-Sultan ýaqytymen túngi 12:00), al ózgeleri bir saǵat erte jabylǵan. Aldyn ala nátijege sai Makron sailaýshylardyń 58,8 paiyz daýysyn jinaǵan, al Le Pende — 41,2 paiyz deidi, Le Figaro basylymy.
Dál osy eki úmitker bes jyl buryn, 2017 jyldyń mamyrynda ótken prezident sailaýynyń ekinshi týrynda da kezdesken edi. Biraq ol kezde Makron edáýir kóp daýys jinaǵan. Sailaýshylardyń 66,1 paiyzy Makronǵa, al Le Penge 33,9 paiyzy daýys bergen.
Bul joly 44 jastaǵy Makronǵa janarmai baǵasy men salyqtyń qymbattaýyna narazy bolyp, birneshe ai boiy jappai narazylyq uiymdastyrǵan "sary jiletter" tobynyń ókilderi qarsy bolǵan. 53 jastaǵy Le Pen bolsa eldiń Eýroodaqtan shyǵýyn qoldaýdan de-fakto bas tartyp, ritorikasyn báseńdetken.
Eger Le Pen bilikke kelse Eýropalyq Odaqqa nuqsan kelýi múmkin degen qaýippen, birqatar eýropa elderiniń jetekshileri Makrondy qoldaǵan edi. Olar Le Pendi, Resei prezidenti Vladimir Pýtinge degen jyly kózqarasy úshin de synaǵan.
Makron Reseidiń Ýkrainaǵa shabýylynan keiin Vladimir Pýtinmen bailanysyn úzbegen. Degenmen onyń pozitsiiasy kúsheiip keledi. Makron ákimshiligi Reseiden keletin munai men gazǵa embargo jariialaýǵa daiar ekenin aityp keledi.
