جەكسەنبٸ, 24 سەۋٸردە فرانتسييادا ٶتكەن پرەزيدەنت سايلاۋىنىڭ ەكٸنشٸ كەزەڭٸندە ەممانۋەل ماكرون جەڭٸسكە جەتتٸ. وسىلايشا ماكرون سوڭعى 20 جىلدا قايتا سايلانعان العاش پرەزيدەنت اتاندى. ونىڭ قارسىلاسى "ۇلتتىق بٸرلٸك" ەسٸرە وڭشىل كٷشتەرٸنٸڭ ٶكٸلٸ مارين لە پەن ٶزٸنٸڭ جەڭٸلگەنٸن مويىنداپ ٷلگەردٸ.
فرانتسييانىڭ ٸرٸ قالالارىندا سايلاۋ ۋچاسكەلەرٸ جەرگٸلٸكتٸ ۋاقىتپەن 20:00 (نۇر-سۇلتان ۋاقىتىمەن تٷنگٸ 12:00), ال ٶزگەلەرٸ بٸر ساعات ەرتە جابىلعان. الدىن الا نەتيجەگە ساي ماكرون سايلاۋشىلاردىڭ 58,8 پايىز داۋىسىن جيناعان, ال لە پەندە — 41,2 پايىز دەيدٸ, Le Figaro باسىلىمى.
دەل وسى ەكٸ ٷمٸتكەر بەس جىل بۇرىن, 2017 جىلدىڭ مامىرىندا ٶتكەن پرەزيدەنت سايلاۋىنىڭ ەكٸنشٸ تۋرىندا دا كەزدەسكەن ەدٸ. بٸراق ول كەزدە ماكرون ەدەۋٸر كٶپ داۋىس جيناعان. سايلاۋشىلاردىڭ 66,1 پايىزى ماكرونعا, ال لە پەنگە 33,9 پايىزى داۋىس بەرگەن.
بۇل جولى 44 جاستاعى ماكرونعا جانارماي باعاسى مەن سالىقتىڭ قىمباتتاۋىنا نارازى بولىپ, بٸرنەشە اي بويى جاپپاي نارازىلىق ۇيىمداستىرعان "سارى جيلەتتەر" توبىنىڭ ٶكٸلدەرٸ قارسى بولعان. 53 جاستاعى لە پەن بولسا ەلدٸڭ ەۋرووداقتان شىعۋىن قولداۋدان دە-فاكتو باس تارتىپ, ريتوريكاسىن بەسەڭدەتكەن.
ەگەر لە پەن بيلٸككە كەلسە ەۋروپالىق وداققا نۇقسان كەلۋٸ مٷمكٸن دەگەن قاۋٸپپەن, بٸرقاتار ەۋروپا ەلدەرٸنٸڭ جەتەكشٸلەرٸ ماكروندى قولداعان ەدٸ. ولار لە پەندٸ, رەسەي پرەزيدەنتٸ ۆلاديمير پۋتينگە دەگەن جىلى كٶزقاراسى ٷشٸن دە سىناعان.
ماكرون رەسەيدٸڭ ۋكرايناعا شابۋىلىنان كەيٸن ۆلاديمير پۋتينمەن بايلانىسىن ٷزبەگەن. دەگەنمەن ونىڭ پوزيتسيياسى كٷشەيٸپ كەلەدٸ. ماكرون ەكٸمشٸلٸگٸ رەسەيدەن كەلەتٸن مۇناي مەن گازعا ەمبارگو جارييالاۋعا دايار ەكەنٸن ايتىپ كەلەدٸ.
