Frantsiia SARS-CoV-2 koronavirýsynyń taralýymen kúres maqsatynda júris-turysqa shekteý qoiady, dep habarlaidy dw.com.
«17 naýryzdan bastap azamattar úiinde bolýy kerek, syrtqa tek azyq-túlik alýǵa, dárigerge qaralýǵa jáne jumysqa barý úshin ǵana shyǵý kerek», - dep málimdedi Frantsiia prezidenti Emmaniýel Makron dúisenbi kúngi teleúndeýinde.
Ol atalǵan sharalardyń kem degende 15 kúnge jalǵasatynyn atap ótti. Budan bólek bilik qazirgi barlyq reformany toqtatty, al mýnitsialdy sailaýdyń ekinshi kezeńi keiinge aýystyryldy. Eýroodaq ishki shekaralardy 17 naýryzdan bastap jabatynyn habarlady Emmaniýel Makron.
Birneshe saǵat buryn Eýrokomissiia tóraǵasy Ýrsýla fon der Liaien (Ursula von der Leyen) jańa koronavirýstyń taralýyna bailanysty EO aýmaǵyna kirýge ýaqytsha tyiym salý týraly usynys jasaǵan bolatyn.
Eske sala keteiik, COVID-19 koronavirýsy 2019 jyldyń sońynda Qytaidyń Hýbei provintsiiasynda paida bolǵan. Sodan beri bul indet 160-tan astam elge tarady. Álem boiynsha virýs juqtyrǵan 180 myńnan astam jaǵdai anyqtalǵan, 7 myńǵa jýyq adam kóz jumǵan, 78 myń naýqas jazylyp shyqqan.
Virýstan kóz jumǵandar sany boiynsha kósh bastap turǵan elder: Qytai, Italiia jáne Iran. DDSU Eýropany jańa aýrýdyń pandemiia oshaǵy dep jariialady.
Frantsiiada 6 633 adam koroavirýs juqtyrǵany anyqtaldy, onyń 148-i qaitys boldy.
Eske sala ketsek, Frantsiiada 13 naýryzda mektepter, ýniversitetter men balabaqshalar jabylǵan bolatyn.
