Frantsiia Braziliiada anyqtalǵan Covid-19 virýsynyń jańa mýtatsiiasynyń taralýynyń aldyn alý maqsatynda ońtústikamerikalyq elmen áýe qatynasyn toqtatty, dep habarlaidy "Ult aqparat".
Frantsiianyń premer-ministri Jan Kasteks bul týraly seisenbi kúni málimdegen. Sarapshylardyń pikirinshe, R1 retinde belgili «braziliialyq nusqa» óte juqpaly jáne naýryz aiynda bul elde koronavirýstan ólim oqiǵalary sanynyń kúrt ósýine sebep bolǵan.
«Biz jaǵdaidyń nasharlap bara jatqanyn baiqap, Braziliia men Frantsiia arasynda barlyq áýe reisterin toqtatý týraly sheshim qabyldadyq», - dep málimdedi Kasteks.
Premer-ministr Braziliia saiahatshylarynyń endi Frantsiiaǵa ushar aldynda jáne munda jetken soń Covid-19 virýsyna test tapsyryp, sondai-aq 10 táýlik karantinde bolýy tiis ekenin atap ótti.
Pandemiia bastalǵaly, Frantsiiada koronavirýsqa shaldyǵýdyń 5,1 mln oqiǵasy tirkelgen, bul – Eýropadaǵy eń joǵary kórsetkish. Pandemiia saldarynan elde 99 myńnan astam adam qaitys boldy.
