QR Parlament Májilisiniń depýtaty Saýytbek Ábdirahmanov Botai mádenietine qatysty qyzyqty derektermen bólisti, dep habarlaidy QazAqparat tilshisi.
«Jylqy alǵash ret Botai jerinde qolǵa úiretildi. Atalǵan fakt ǵylymi turǵyda dáleldengen. Biraq jylqynyń alǵash ret qai jerde qolǵa úiretilgenine qatysty uzaq jyldar boiy daý-damailar boldy. Búginde bul máselege núkte qoiyldy deýge bolady. Máselen, byltyr men Parijde boldym. Ol jaqta meniń ulym jumys isteidi. Eifel munarasy janynda adam tarihy mýzeii bar eken. Meni soǵan alyp bardy. Biraq neni kórsetetinin aitqan joq. Sóitse, ol jerde domalaq bir zal bar. Onda adamzattyń eń mańyzdy degen 10 jańalyǵy kórsetilgen. Sonyń ishinde jylqyny qolǵa úiretý de bar. Al Botai mádenieti jylqyny alǵash ret qolǵan úiretilgen jer dep frantsýz tilinde jazylǵan», - dedi S.Ábdirahmanov Astanada ótken jiynda.
Depýtat frantsýz tilindegi jazýdyń aýdarmasyn da oqyp berdi. Ol jerdegi stendte bylai jazylǵan: «Botai mádenieti Ortalyq Aziianyń dala men alqaptarynyń qiylysynda ornalasqan. Dál osy jerde bizdiń eramyzǵa deiingi IV myńjyldyqta adam alǵash ret jylqyny qolǵa úiretti. Ol jerdegi adamdar jartylai kóshpeli sharýashylyqty júrgizdi. Sonyń izderi kólderdiń ainalasynan tabylǵan. Olardyń aǵash lashyqtary sol kezdegi Eýropa úilerine uqsaidy. Al oiý-órnegi bar keramikany neolitke deiin qoldandy. Shaǵyn tas saimandary da boldy». S.Ábdirahmanovtyń aitýynsha, Parijdiń qaq ortasynda turǵan atalǵan jazýdyń ózi álemniń Botai mádenietin moiyndap otyrǵanyn kórsetse kerek.
«Botai mádenietin Viktor Zaibert ashty. Negizi, ataýy basqasha atalyp ketýi de múmkin edi. Máselen, Botai mádenieti emes, Nikolskii mádenieti delinýi de múmkin edi. Óitkeni, ózenniń arǵy jaǵynda Nikolskii degen shaǵyn aýyl bar. Biraq Zaibert óte aqyldy adam bolǵan. Qazaqstandaǵy jańalyǵyn Nikolskii mádenieti dep atasa, ony basqa jerlermen shatastyrýy ábden múmkin. Óitkeni Nikolskii mádenieti Tývada, Iakýtiiada nemese Mýrmanskide bolýy yqtimal. Sondyqtan ǵalym jaqyn jatqan Nikolskiidi emes, Botai aýylynyń ataýyn aldy. Botai degen kisi Abylai hannyń kezinde úlken batyr bolǵan», - dep atap kórsetti S.Ábdirahmanov.
