Foto: Instagram/mukhtarablyazov
Bas prokýrordyń orynbasary Áset Shyndaliev Frantsiia tarapy Ábliazovti Qazaqstanǵa qaitara ma degen suraqqa jaýap berdi, - dep habarlaidy Tengrinews.kz portaly.
Májilis kýlýarynda jýrnalister Bas prokýratýra ókilinen Muhtar Ábliazovti Frantsiiadan Qazaqstanǵa ekstraditsiialaý múmkindigi týraly surady.
"Ábliazov boiynsha Frantsiia Respýblikasymen arada shart joq. Qazir ózara qarym-qatynas printsipteri týraly frantsýz shartyn basshylyqqa alamyz. Biz óz saýalymyzdy jiberemiz, olar ózara qarym-qatynas printsipi boiynsha oryndaidy. Ekstraditsiialaýǵa keletin bolsaq, ózara kelisimshartsyz suraý jiberemiz. Frantsiia berip-bermeitinin ózderi sheshedi", - dep túsindirdi bas prokýrordyń orynbasary.
Sonymen qatar, Shyndaliev Frantsiiamen qylmystyq ister boiynsha quqyqtyq kómek týraly shartta ekstraditsiialaý qarastyrylmaǵanyn atap ótti.
"Depýtattar talqylaý barysynda bul týraly aitty. Bul kelisim boiynsha ekstraditsiialaý qamtylmaidy. Ol quqyqtyq kómek kórsetý, tergeý áreketterin júrgizý, jaýap alý, tintý jaǵdailaryna qoldanylady. Iaǵni, bul shart adamdardy qylmystyq jaýapkershilikke tartý úshin qaitarýdy kózdemeidi.
Bul Ábliazovqa qatysty dep aitpas edim. Bizde 29 elmen osyndai sharttar jasaldy. Olar - ártúrli elder, sonyń ishinde eýropalyq elder. Sondyqtan muny qandai da bir adam úshin ádeii istep jatyrmyz deýge bolmaidy", - dedi Áset Shyndaliev.
Onyń aitýynsha, Frantsiia prokýratýrasy óziniń jáne qazaqstandyq materialdar boiynsha qylmystyq is qozǵaǵan.
"Tergeý soty osy materialdar boiynsha Ábliazovty ustaý týraly sheshim qabyldady. Ábliazov pen onyń advokattary tergeý sotynyń bul sheshimderine shaǵymdandy. Sot ishinara ótinishti qanaǵattandyrdy. Biraq Frantsiia prokýratýrasy bul sheshimge shaǵymdandy, ol qaralyp jatyr", - dep qorytyndylady bas prokýrordyń orynbasary.
Aita keteiik, Qazaqstan men Frantsiia qylmystyq ister boiynsha ózara quqyqtyq kómek týraly kelisimge kelgen. Eki el bir-birine múlikti tintý nemese tárkileý týraly ótinishter jibere alady. Sonymen qatar, buǵan deiin Frantsiia Muhtar Ábliazovqa saiasi baspana berýden bas tartqan edi.
