Frantsiia men Ispaniiada baqylaýdan shyqqan orman órtterine bailanysty evakýatsiialanǵan turǵyndar sany 300 myńnan asty. Bul týraly AFP agenttigine silteme jasaǵan DW habarlady.
Frantsiianyń ońtústik-batysyndaǵy Jironda departamentinde, ákimshilik ortalyǵy Bordo qalasy mańynda birneshe kúnnen beri jalǵasyp jatqan órtter asa qarqyndy ári boljap bolmaityn sipatqa ie bolǵan. Tabiǵi apat saldarynan keminde 240 turǵyn úi janyp ketken. Soǵan qaramastan Bordo qalasynyń biligi ázirge qalany tolyq evakýatsiialaý qajettiligi joq ekenin málimdedi. Qazirgi ýaqytta munda ózge eldi mekenderden kóshirilgen myńdaǵan adam ornalastyrylǵan.
Frantsiiada qaýipsiz jerge kóshirilgenderdiń sany 250 myńǵa jetti. Órtpen kúreske 2,5 myńnan astam órt sóndirýshi, 1,5 myń áskeri qyzmetker jáne 1,2 myń politsiia qyzmetkeri jumyldyrylǵan.
Mamandardyń aitýynsha, jaǵdaidy orman órtterinen paida bolatyn pirokýmýlonimbýs bulttary kúrdelendirip otyr. Mundai bulttar kúshti jel týǵyzyp, naizaǵaidyń paida bolýyna sebep bolýy múmkin. Bul óz kezeginde jańa órt oshaqtarynyń shyǵýyna ákeledi.
Al Ispaniiada negizgi órt oshaqtary Madrid mańyndaǵy ortalyq óńirlerde, sondai-aq Avila, Toledo jáne Kastelon provintsiialarynda tirkelgen. El boiynsha shamamen 75 myń adam evakýatsiialanǵan. Onyń ishinde Valensiia óńirinde ǵana demalys kúnderi qaita kúsheigen órt saldarynan 15 myń turǵyn qaýipsiz jerge kóshirildi.
Tabiǵi apatpen kúreske Eýropanyń birneshe memleketi qoldaý kórsetip jatyr. Frantsiiaǵa Horvatiia men Portýgaliiadan órt sóndirýge arnalǵan ushaqtar, Chehiia men Slovakiiadan Black Hawk tikushaqtary jiberilýde.
Ispaniiaǵa Italiia eki Canadair amfibiia ushaǵyn attandyrdy. Sonymen qatar el Grekiia, Niderland jáne Portýgaliianyń aviatsiialyq tehnikasyn da paidalanyp, orman órtterin aýyzdyqtaýǵa kúsh salyp jatyr.
