.jpg)
Kollaj: ult.kz
Búgin Májiliste «Eldiń kólik-logistikalyq áleýetin damytý týraly» Úkimet saǵaty ótti. Onda depýttar Air Astana kompaniiasynyń prezidenti Piter Fosterge shúilikti. Bul týraly ULT.KZ tilshisi habarlaidy.
Depýtattar Piter Fosterge Qazaqstanda jumys istep jatqanyn eskertip, jergilikti halyqpen sanasýy kerek ekenin basa aitty.
«Siz kúlmeńiz otyryp alyp! Siz bizdi mensinbei otyrsyz. Bul jerde kúletin eshteńe joq. Biz sizge aborigen emespiz Afrikadaǵy eshteńe túsinbeitin. Oinamańyz! Bul parlament! Osy jerde otyrǵandardyń bári halyqtyń ókili», -dep depýtat Edil Jańbyrshin kúlip otyrǵan Piter Fosterge qarap, ashýǵa býlyqty.
Depýtat «Air Astana bizdiń aspanymyzdyń qudaiy bolyp alǵan» dep, áýe kompaniiasynyń basshysyna «osy elde jumys istep otyrǵasyn, bizdiń eldiń múddesin qorǵap, zańyn syilaýyńyz kerek» dep eskertý jasady.
«Air Astana-nyń máselesin maishammen qaraý kerek. Foster myrza, shańyraqqa qarańyz! Siz osy memlekettiń zańyna baǵynýyńyz kerek. Biz Musabaev ekeýimiz 1 saǵat keshikkenge 3 paiyz aiyppul salatyn norma engizdik. Endi qyzyqty qarańyz, Air Astana 12 saǵatqa keshikti, men áli aiyppulyn ala almai júrmin. Nege? Olar quiturqy shema jasap qoiǵan», -deidi depýtat.
Májilis depýtaty Baqytjan Bazarbek te Edil Jańbyrshinniń Foster myrzaǵa «shańyraqqa qarańyz!» degen eskertýin qoldaitynyn aitty. Ol óz basynan ótken jaǵdaidy mysalǵa keltirdi.
«Halyq reisten qalyp, 8 saǵat turdy. Al Foster myrza sol halyqtyń qasynan ótti. Bári Air Astana dep shýlap jatyr. Toqtamai laýndj barǵa kirip ketti. Sol laýndj barda kofesin iship otyrǵan. Men de sol reistiń ishindemin. Men kóterildim de, sol Foster myrzaǵa: -"Astynda halyq kútip otyr, nýka túsińiz! " dedim. Sonda ol túspeidi, óziniń ókilderin jiberip qoiǵan. Sonda ol túskisi kelmeidi, halyqpen kezdeskisi kelmeidi. Mine, qarym-qatynasy osyndai! Tek men ózimniń depýtattyq kýáligimdi kórsetkennen keiin ǵana tústi», -deidi depýtat.
Sodan keiin depýtat Baqytjan Bazarbek Air Astana Karib araldarynda tirkelgenin, kompaniianyń barlyq ushaqtary Irlandiiada tirkelgenin aitty.
«Azamattyq aviatsiia konventsiiasynyń 17 babyna sáikes áýe kemeleri qai elde tirkelse, sol eldiń ieligi bolyp tanylady. Iaǵni Air Astana-nyń 50 áýe kemesi Irlandiiada tirkelgen. Azamattyq aviatsiia konventsiiasynyń 17 bap talaptary boiynsha Air Astana Qazaqstan kompaniiasy emes, ol Irlandiia áýe kompaniiasy. Biz biýdjetten milliardtaǵan sýbsidiany Qazaqstan kompaniiasyna emes, Irlandiia kompaniiasyna bólemiz, áriptester! Al konventsiianyń 18 baby boiynsha eki tirkeýge tyiym salynǵan. Ol eki el azamattyǵy siiaqty. Sondai-aq, Keiptaýn konventsiiasynyń «Jyljymaly qurylǵyǵa halyqaralyq kepildik boiynsha» 20 babynda "belgili bir elde tirkeý kelesi eldiń kelisimimen júzege asady" delingen. Meniń suraǵym, bizdiń Úkimet áýe kemelerin Irlandiiada tirkeýge ruqsat bergen be? Jaýap bar. 2012 jyly bizdiń Úkimet Air Astana barlyq áýe kemelerin Irlandiiada tirkeýge qujattardyń barlyǵyna qol qoiǵan. Air Astana Irlandiia kompaniiasy bolsa, biz nege milliardtaǵan aqsha jumsaimyz?» -deidi depýtat.
Sondai-aq ol lizingtik áýe kompaniialaryna salyq Irlandiiada -1,25 paiyz bolǵany bizge tiimdi, biraq qandai da bir jaǵdai bolsa áýe kemeler Irlandiiada qalýy múmkin degen qaýip bar ekenin aitty.
Air Astana-nyń monopoliialyq jaǵdaiyna bailanysty osy kezge deiin sapaly áýe qyzmetin paidalana almai otyrmyz dep shaǵymdanǵan depýtat Abzal Quspan kemshilikterdi saýsaqpen sanap berdi.
«Tutynýshylardyń quqyǵy buzylady, bir. Keshigedi, eki. Reisterin "otmenit" etip tastaidy, úsh. Biraq bul úshin eshqandai jaýapkershilik joq bul kompaniiaǵa», -degen depýtat Air Astana-nyń monopoliialyq jaǵdaiy qashan sheshiletinin surady.
«Mundai keshigýler basqa elderde de bar»
QR Kólik ministri Marat Qarabaev ushaq reisiniń keshigýi qalypty jaǵdai, barlyq elde solai ekenin aitty.
«Álemde "regýliarnost poleta" degen bolady. Biyl 23 paiyz ushaq keshikken, 77 paiyzy ýaqytyly ushty. Dál osyndai indikator basqa elderde de bar», -degen ministr biylǵa ushaq reisteriniń keshigýi eldegi birneshe áýejailarda ushý alańdaryndaǵy jóndeý jumystaryna bailanysty degen ýáj aitty.
Depýtattar Air Astana-ǵa qarasty FlyArystan kompaniiasy týraly da másele kóterdi.
«Eýropada loýkosterlerdegi bilettiń ortasha quny 20 eýro, al bizde FlyArystan loýkosterine búgin bilet qaradym, Túrkistanǵa 60 myń teńge, Qyzylordaǵa 50 myń teńge. Bul qalai loýkoster bolady?! Negizi bul eki kompaniia (Air Astana men FlyArystan, red.) bir kompaniia, bir zańdy tulǵa, bir transport», -dedi májilismen Murat Ábenov.
Depýtat Juldyz Dosbergenqyzy Piter Fosterge óz saýalyn joldady:
«Biz 7 shaqyrylym «Jańa Qazaqstan»depýtattyq toby bolyp turǵan kezde, Samuryq-Qazynanyń basshylyǵy bar, shaqyryp, sizderge usynys aitqan bolatynbyz. Ol usynystyń negizi qazaqtildi kontent boiynsha edi. Qazirgi tańda balalardyń kontenti, aýdiokitaptardyń kontenti, sonymen qatar qazaq filmderi, derekti filmder qazaq tilinde sapaly kontentter jasalyp jatyr. Biz Air Astana-men alys shetelge barsaq ta, tipti Almatyǵa deiin júrsek te, sizderdegi kontent sol talapqa sáikes kelmeidi. Jeńil-jelpi nemese sheteldik kontent. Soǵan bailanysty, bizdiń aqparatqa jáne sapaly kontentke qoljetimdilik máselesine kóńil bólip, balalardyń jas erekshelikteriniń aiasynda qandai kontent bar, sol kontentti júktep qoiýlaryńyzdy qaitadan suraimyz?» -dedi Juldyz Dosbergenqyzy.
Aita keteiik, wikipedia málimeti boiynsha Air Astana áýekompaniiasy "Samuryq-Qazyna" Ulttyq ál-aýqat qorynyń (51 %) jáne britandyq BAE Systems PLC kompaniiasynyń (49%) birlesken kásiporny retinde qurylyp, 2002 jylǵy 15 mamyrda kommertsiialyq reisterdi oryndai bastady.
2024 jylǵy aqpanda kompaniia Qazaqstan jáne London qor birjalarynda Qos listing aldy. Bul Ortalyq Aziia men Kavkaz óńirindegi eń iri áýekompaniia, Qazaqstannan ishki jáne óńirishilik marshrýttarda naryqtyń 69% jáne 40% -alady.
Baljan Jeńisqyzy
