Qazaqstandyq «Rýhani jańǵyrý» qoǵamdyq damý institýty júrgizgen forsait-zertteý barysynda sessiia qatysýshylary 2035 jyly jas qazaqstandyqtyń beinesin qalyptastyrdy, dep habarlaidy "Ult aqparat".
«Rýhani jańǵyrý» qazaqstandyq qoǵamdyq damý institýty QR AQDM qoldaýymen bolashaqqa qatysty boljam jasaýǵa múmkindik beretin Rapid Foresight ádisnamasy negizinde forsaittyq zertteýler uiymdastyrdy. Ótkizilgen forsait-sessiialarǵa ǵylymi jáne saraptamalyq qoǵamdastyqtyń, memlekettik organdardyń, biznes-qoǵamdastyqtyń, ÚEU jáne t.b. ókilderi qatysty.
Sessiianyń biri bolashaq qazaqstandyqtyń beinesin qalyptastyrýǵa arnaldy. Qatysýshylarynyń pikirinshe, jas qazaqstandyqtyń beinesi «tsifrlyq nomad» anyqtamasynda kórinis tapqan. Osylaisha, tsifrlyq nomad ikemdilik pen ózin ózgertýge daiyndyq, álemge kirigý jáne ósýdiń jeke baǵdarlamasyna ie bolý, jahandyq oilaý, barlyq salalarda «sandy» paidalaný jáne densaýlyqqa mańyzdy kapital retinde qaraý syndy birqatar mańyzdy quzyretterge ie.
«Jahandaný protsesteri kásibi jáne jeke quzyretterge jańa suranystar jasaidy. Qazaqstandyqtyń beinesin qalyptastyrý otbasy, bilim jáne qoǵam salalarynda júretinine kúmán joq. 2035 jylǵa qarai olardyń túbegeili ózgerýi bek múmkin», -delingen forsait-sessiiasynyń zertteýinde.
Sessiia nátijelerine sáikes, otbasy mektep jáne JOO júieleri naryǵynyń qajettilikterine sáikes kelmeýine bailanysty tárbie ádisteri men bilim berý baǵdarlamalaryn tańdaý máselesine sanaly túrde qaraityn bolady. Kóptegen otbasylar, múmkin bolsa, úide oqytýdy jón kóredi.
Óz kezeginde, bilim berý tsifrǵa negizdeletin bolady.
«Mektep jeke traektoriialar men oqý baǵdarlamalaryn qura otyryp, jeke tulǵaǵa baǵdarlanady. Jastar joǵary bilimniń tolyq tsiklyn emes, naqty quzyretterdi alýǵa baǵyttalǵan. Sertifikattaý jáne qysqa merzimdi kýrstar baǵdarlamalary suranysqa ie bolady. Ómir boiy adam óz bilimin jańartýǵa nemese qaita oqýǵa májbúr bolady», - delingen zertteýde.
Forsait-sessiiaǵa qatysýshylardyń pikirinshe, jas qazaqstandyqtar sailaý jáne qoǵamdyq baqylaý esebinen tsifrlyq úkimet arqyly saiasi úderisterge tartylady.
Sonymen qatar, ornalasý endi ómirlik resýrstarǵa qol jetkizýge áser etpeidi.
Zertteý eńbeginiń tolyq nusqasymen myna silteme arqyly tanysýǵa bolady.
