Ázerbaijan prezidenti Ilham Áliev búgin maýsym aiynda «Formýla-1» Gran-priiniń ótýine bailanysty elge keletin sheteldikter men azamattyǵy joq adamdar úshin vizalyq rásimderdi jeńildetý týraly ókimge qol qoidy, dep habarlaidy QazAqparat.
Qujatqa sáikes, «Formýla-1» jarysyna qatysýǵa kelgen sheteldikter 2021 jylǵy 1 mamyrdan 15 maýsymǵa deiin eldiń halyqaralyq áýejailarynda viza ala alady. Bul rette olar tómendegi qujattardyń birin usynýy kerek:
- Jarys uiymdastyrýshylarynyń – Formula One Management Limited kompaniiasynyń jáne halyqaralyq avtomobil federatsiiasynyń akkreditteý kartasy;
- «Baku City Circuit» («Baký qalalyq ainalymy») operatsiialyq kompaniiasy bergen akkreditteý kartasy.
Osyǵan bailanysty Ázerbaijan Syrtqy ister ministrligine tiisti organdardy, halyqaralyq jarys uiymdastyrýshylaryn vizalyq rásimderdi jeńildetý týraly habardar etý jáne osy aqparatty ministrliktiń internet-resýrstary men Ázirbaijannyń sheteldik ókildikterinde ornalastyrýdy qamtamasyz etý tapsyryldy.
Uiymdastyrýshylardyń aitýynsha, «Formýla-1» jarysynyń «Ázerbaijan Gran-prii» 2021 jyly jańa jaǵdai boiynsha – kórermendersiz ótedi jáne jýrnalister sany shekteýli bolady. Jarys 6 maýsymda Baký qalasynyń kóshelerinen júrip ótedi.
Esterińizge sala keteiik, Formýla-1 Álem chempionatynyń bul maýsymy kezeńderdiń rekordtyq sanyn qamtidy (23), sonymen qatar avtojarys álemine birinshi ret «koroldik jarystar» áleminiń segiz dúrkin chempionyn syilai alady.
