Foto: Caravan.kz
Atyraýdan Aqtaýǵa baǵyt alǵan ushaq 2 qarasha kúni 06:40-ta ushýy tiis edi. Alaida FlyArystan áýekompaniiasy aýa raiynyń qolaisyzdyǵyna bailanysty reisti keshiktirýge májbúr boldy, dep habarlaidy Ult.kz Lada.kz basylymyna silteme jasap.
Áýekompaniianyń málimetinshe, jolaýshylarǵa sýsyndar, ystyq tamaq jáne qonaqúide ornalasý usynylǵan.
«Aqtaý — Ystanbul qosalqy reisine úlgermei qalǵan barlyq jolaýshylar tolyq aqshasyn qaitaryp ala alady nemese tegin qaita brondaý múmkindigin paidalana alady», - delingen habarlamada.
Keshiktirilgen KC7277 reisi 2 qarashada 21:50-de ushty. Alaida Aqtaý áýejaiyndaǵy qalyń tuman men kóriný deńgeiiniń minimaldan tómen bolýyna bailanysty ushaqty qondyrý múmkin bolmady. Ushaq Atyraýǵa oralý týraly sheshim qabyldandy.
3 qarasha kúni tańǵy 06:50-de ushaq ekinshi ret ushyp shyqty, biraq Aqtaýdaǵy aýa raiynyń qolaisyzdyǵyna bailanysty taǵy da Atyraýǵa qaityp keldi.
«Jolaýshylarǵa sý men ystyq tamaq berildi, sonymen qatar suranys boiynsha qonaqúige ornalastyrý jáne turǵyn úi qunyn óteý týraly kepildik hattar usynyldy», - deidi áýekompaniia ókilderi.
Reis 3 qarasha, jeksenbi kúni 17:30-ǵa josparlandy.
FlyArystan jolaýshylardan qolaisyzdyq úshin keshirim surap, aýa raiynyń ushý reisteriniń keshigýine áser etetin sharasyz jaǵdai ekenin eske saldy.
