Fly Arystan biýdjettik áýe kompaniiasy jýyq arada áýe biletterin satýdy bastaidy, dep habarlady Azamattyq aviatsiia komiteti.
QR IIDM Azamattyq aviatsiia komiteti Memleket Basshysy Nursultan Nazarbaevtyń tapsyrmasyna sáikes «Eir Astana» aviakompaniiasymen birlesip, Fly Arystan biýdjettik áýe kompaniiasyn iske qosý boiynsha belsendi jumys júrgizilip jatqanyn aitty.
«2019 jyldyń 29 naýryzynda áýe kompaniiasynyń kommertsiialyq reisterine biletter satylymy bastalady dep josparlanyp otyr. Qazaqstannyń Fly Arystan aviakompaniiasy 2019 jyldyń mamyrynan bastap kommertsiialyq reisterdi oryndaidy dep kútilýde. Áýe kompaniiasy Almatydan Astana, Atyraý, Kókshetaý, Pavlodar, Qaraǵandy, Qostanai, Pavlodar, Taraz qalalaryna kúndelikti ushatyn bolady. Josparǵa sáikes, bastapqy kezeńde kompaniianyń áýe floty «Eir Astana» áýekompaniiasynyń 180 oryndyq ekonom-klasty Airbus A320 ushaqtarynan quralmaq. 2022 jyldyń sońyna qarai lainerlerdiń sany 15-ke jetedi», - delingen komitettiń habarlamasynda.
Loýkost tasymaldaǵyshtardyń dástúrli aviakompaniialardyń biznes-modelinen basty aiyrmashylyǵy - shyǵyndardy barynsha azaitýy. Áýe biletteriniń qunyn arzan baǵamen tómendetýge birneshe faktorlar arqyly qol jetkiziledi. Atap aitqanda, áýe kemeleriniń joǵary syiymdylyǵy, internet arqyly bilet satyp alý, áýe kompaniiasynyń joljúk baǵasyn belgileý quqyǵy, týristik agenttikterge komissiialardyń berilmeýi, qosylys reisteriniń bolmaýy, kemedegi biryńǵai oryndyqtar, áýe kemesiniń minimaldy ekipajy, áýe kemelerine jerdegi qysqa merzimde qyzmet kórsetý, barlyq qosymsha qyzmetterdi (bagaj, borttaǵy tamaq nemese kabinadaǵy oryndy tańdaý jáne t.b.) aqyly etý, jańa áýe kemesinen turatyn ushaq parki, olardyń barynsha birdei bolýy men elektrondy biletpen ǵana qamtamasyz etý amaldary arqyly áýe biletiniń qunyn arzandatý josparlanyp otyr.
Eske sala ketsek, osy jyldyń qańtar aiynda Úkimettiń keńeitilgen otyrysynda Indýstriia jáne infraqurylymdyq damý ministri Jeńis Qasymbek 2019 jyldyń birinshi jartyjyldyǵynda tómen biýdjetti Fly Arystan ulttyq aviakompaniiasy iske qosylatynyn málim etken bolatyn.
