QR Densaýlyq saqtaý ministrligi áleýmettik jelide halyqtyń aryz-shaǵymyn qabyldaityn paraqsha ashty, dep habarlaidy QazAqparat tilshisi.
«Ministrdiń kómekshisi» dep atalatyn resmi paraqshaǵa Feisbýk qoldanýshylary densaýlyq saqtaý júiesindegi shaǵymdar men usynystaryn jibere alady.
«Qoldanýshylar paraqshaǵa densaýlyq saqtaý júiesine qatysty jazba qaldyrady nemese jariialylyqty qalamaityndar jeke habarlama jibere alady. Paraqshany tórt ákimshi - Ministrlik ókili, Farmatsiia komiteti, Qoǵamdyq densaýlyq saqtaý komiteti jáne dári-dármek boiynsha SQ-Farmatsiia ókili júrgizedi. Olardyń árqaisysy óz baǵyttary boiynsha jaýap beredi. Ózekti suraqtarǵa barynsha tez jaýap berýge tyrysamyz. Óńirlik qurylymdar men densaýlyq saqtaý basqarmalaryna qatysty suraqtardy jedeldetilgen rejimde tiisti ákimdikterge jiberemiz. Barlyq ákimdermen tyǵyz bailanys ornatylǵan», - dedi QR Densaýlyq saqtaý ministrliginiń resmi ókili Ernar Ákimqulov.
Resmi ókildiń aitýynsha, paraqsha tańǵy 9-dan keshki 6-ǵa deiin jumys isteidi, al suraqtardy táýlik boiy jiberýge bolady.
