Rejisser Talǵat Jánibekov ustalyp, Almaty IID ýaqytsha ustaý izoliatoryna qamaldy. Bul týraly kaz.tengrinews.kz tilshisine kúdiktiniń advokaty Serik Aitbaev habarlady.
"Búgin ony "qylmys ornynda quryqtaldy" dep ustap áketti. Ustaý týraly qaýlyda solai jazylǵan. Kúlkili. 72 saǵatqa ustaý úshin adam qylmys ornynda ustalýy kerek", - dep habarlady Serik Aitbaev.
Buǵan deiin Talǵat Jánibekov eshqaida ketpeý týraly qolhatpen jiberilgen. Advokatynyń aitýynsha, bultartpaý sharasyn ózgertýge prokýrordyń nemese tergeý sýdiasynyń sanktsiiasy qajet.
"Sondyqtan osyndaidy oilap tapqan, 72 saǵat ustaý úshin. Bizge 1000 AEK kóleminde kepilaqy berý týraly resmi túrde habarlady, sonda ǵana barlyǵy jaqsy bolady eken", - dedi advokat.
Talǵat Jánibekov "Feniks" filminiń túsirilimderine arnalǵan qarajattyń jymqyrylýy isinde kúdikti. Tergeýdiń málimetinshe, rejisserge senip tapsyrylǵan múlikti iemdendi nemese jumsap qoidy degen kúdik keldi. Onyń kinási dáleldense, múlki tárkilene otyryp, 7 jyldan 12 jylǵa deiin bas bostandyǵynan aiyrylady.
Aita keteiik, osy daýly film boiynsha belgili akter Tuńǵyshbai Jamanqulov ustalyp, keiin kepilaqymen bosatylǵan edi. Ol 79 million teńge jymqyrdy degen kúdikke ilingen. Keiin ol óz kinásin moiyndap, qarajattyń 6 million teńgesin qaitarǵan. Memlekettik qyzmet isteri jáne sybailas jemqorlyqqa qarsy is-qimyl jónindegi agenttiktiń tóraǵasy Qairat Qojamjarovtyń aitýynsha, ártis "Qazaqfilmge" qaryzdy óndirip berýge ýáde etken.
