Astanada Federatsiia kýbogy úshin irikteý kezeńiniń finalynda Qazaqstan men Qytai quramalary kúsh synasýda, dep habarlaidy QazAqparat tilshisi.
Jeńimpaz qurama Álemdik toptyń plei-off kezeńine joldama alatyndyqtan, bul matchtyń mańyzy zor.
Kortqa alǵashqy bolyp Qazaqstannan Zarina Diias, Qytaidan Chjen Saisai shyqty. Zarina álemdik reitingte 96-orynda bolsa, qarsylasy 42-satyda edi.
Kezdesýdi Zarina tamasha bastap, qos birdei breikpen alǵa shyqty - 4:0. Degenmen qytailyq qyz da qalyspai, qatarynan úsh geimdi aldy. Budan keiin qazaqstandyq tennisshi taǵy bir breik jasady - 5:3. Sodan keiin setke dop bergende, qarsylasyna múmkindik bergen joq - 6:3.
Z.Diias ekinshi partiiany breikpen bastap, sodan soń tartysty ótken óz geimin jibermedi - 2:0. Sol breiktiń arqasynda únemi alǵa shyǵyp otyrdy - 3:1, 4:2. Sosyn taǵy bir breik jasady - 5:2. Zarina sońǵy geimde úshinshi matchbolyn paidalana bildi - 6:2.
Tartysty ótken báseke 1 saǵat 35 minýtqa sozyldy.
Kezdesý barysynda otandasymyz tamasha óner kórsetip, qytailyq sportshynyń adymyn ashtyrmady. Buǵan deiin Z.Diias bir-birin jaqsy biletin Chjen Saisaidan bes ret jeńilgen eken, búgin sonyń esesin qaiyrdy.
Keshe Qazaqstan - Úndistan matchynda Zarina Diiastyń oiynyn Elbasy Nursultan Nazarbaev tamashalap, qoldaý bildirgen bolatyn. Sodan keiin Zarina instragramdaǵy paraqshasynda Prezidenttiń ózine saǵat syilaǵanyn jariialaǵan edi. Búgin Z.Diias Elbasy syilyǵynyń ózin shabyttandyryp, jeńiske jigerlendirgenin jetkizdi.
Búgin ekinshi oiynda Qazaqstannyń birinshi, álemniń 43-raketkasy Iýliia Pýtintseva reitingte ózinen úsh saty joǵary turǵan Chjan Shýaimen sheberlik baiqasady. Sodan keiin Galina Voskoboeva men Anna Danilinanyń Iafan Van jáne Ifan Siýidiń juptyq kezdesýi josparlanǵan.
Eske sala keteiik, budan buryn Astanada ótip jatqan Federatsiia kýbogy úshin irikteý kezeńinde Qazaqstan - Úndistan matchyn áýeli Zarina Diiastyń jeńispen bastap, Iýliia Pýtintsevanyń jalǵastyrǵanyn, sosyn Galina Voskoboeva men Anna Danilinanyń juptyq kezdesýdi utqanyn, al erler arasynda Aleksandr Býbliktiń Býdapesht týrniriniń jartylai finalyna shyqqanyn jazǵan bolatynbyz.
