Foto: ál-Farabi atyndaǵy QazUÝ-dyń Baspasóz qyzmeti
Ál-Farabi atyndaǵy QazUÝ-da farabitanýshylardyń respýblikalyq ǵylymi-tájiribelik konferentsiiasy «Ustazdyń oralýy» taqyrybynda ótti.
Is-sharany «Ǵylym ordasy», Almaty qalasynyń Bilim basqarmasy, QazUÝ janyndaǵy Ál-Farabi ortalyǵy jáne «Nur-Múbarak» Egipet islam mádenieti ýniversiteti uiymdastyrdy. Ekikúndik is-sharaǵa farabitanýshy ǵalymdar, oqytýshylar men stýdentter qatysty.
QazUÝ basshylyǵynyń atynan Basqarma tóraǵasynyń orynbasary – birinshi prorektor m.a. Erkin Dúisenov sóz sóilep, Ábý Nasyr ál-Farabidiń esimimen atalatyn ýniversitet Shyǵys oishylynyń ideialaryn nasihattaýda úlken jumys atqaryp otyrǵanyn aitty.
Konferentsiia moderatory, filosofiia fakýltetiniń dekany Bekjan Meiirbaev is-shara ál-Farabi muralaryn jańǵyrtýǵa, farabitaný salasynda jańa ǵylymi zertteýlerge jol ashatynyn atap ótti.
«Ǵylym ordasynyń» bas direktory Ular Muqajanov: «konferentsiia Maǵjan Jumabaevtyń týǵanyna 130 jyl tolýyna jáne mádeniettanýshy ǵalym, memleket jáne qoǵam qairatkeri Murat Áýezovtiń týǵanyna 80 jyl tolýyna, sondai-aq Almaty qalasynda Túrki halyqtary mádeni qorynyń 25 jyldyǵyna orai uiymdastyrylyp otyr», – dedi.
50 jyl buryn Almatydaǵy Aziia jáne Afrika elderi jazýshylarynyń V konferentsiiasy aiasynda ál-Farabi murasyna arnalǵan jiyn ótken edi. Konferentsiianyń «Ustazdyń oralýy» dep atalýy da osy dataǵa bailanysty.
Konferentsiiaǵa Niderlandtaǵy «Eýraziia perspektivasy» akademiialyq ortalyǵynyń basshysy Zifa-Alýa Áýezova beinebailanys arqyly qatysty.
«Ortalyq Aziianyń ziiatkerlik tarihymen ainalysatyn ǵalym retinde Ábý Nasyr ál-Farabi, Maǵjan Jumabaev jáne Murat Áýezov esimderi men úshin erekshe mańyzǵa ie. Árine, bular bir-birine uqsamaityn, qai jaǵynan alsaq ta, erekshe qaitalanbas tulǵalar, olardyń ómir súrgen dáýiri, aýqymy da bólek, sol kezdegi qoǵamdaǵy syn-tegeýrinderi men ziiatkerlik orta múldem basqa boldy. Soǵan qaramastan, Murat Muhtarulynyń ǵylymi, shyǵarmashylyq ustanymyna filosof ál-Farabi murasy úlken áser etti. Murat Muhtarulynyń filosofiia tarihyna degen qyzyǵýshylyǵyna ǵulama ustazdyń Ortalyq Aziia men Taiaý Shyǵystyń intellektýaldyq tarihyndaǵy erekshe róli yqpal etti», – dedi spiker.
Plenarlyq otyrysta Almaty qalasyndaǵy Túrkiia Respýblikasy konsýldyǵynyń bilim attashesi Aihan Qorqmaz, «Túrki halyqtarynyń mádeni qorynyń tarihy men maqsaty» túrki halyqtarynyń mádeni qorynyń basshysy Ahmet Daitýran, Y.Altynsarin atyndaǵy Ulttyq bilim akademiiasynyń prezidenti Mádina Tynybaeva, QazUÝ professory, farabitanýshy ǵalym Jaqypbek Altaev, filosofiia ǵylymynyń doktory, professor, filosofiia jáne saiasattaný fakýlteti Dintaný jáne mádeniettaný kafedrasynyń meńgerýshisi, saiasi ǵylymdar doktory Ainur Qurmanalieva syndy ǵalymdar mazmundy baiandamalar jasady.
Eki kúndik konferentsiia jumysy sektsiialyq otyrystar aiasynda jalǵasty. Mamandar qazirgi farabitanýdyń ózekti máseleleri boiynsha oi bólisip, pikir almasty. Is-shara aiasynda «Qazaqstan ádebieti men ónerindegi ál-Farabi» kitap kórmesi, «Qazaqstannyń ǵylym men mádeniet tarihynda ál-Farabi beinesi» atty sýret kórmesi jáne «Ál-Farabi» ǵylymi-tanymdyq aqparattyq ortalyǵynyń ashylý rásimi ótti.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne dizainerlik óner
kafedrasynyń oqytýshysy
