Facebook áleýmettik jelisi Resei jáne Iranmen bailanysy bar 652 paraqsha men topty AQSh Kongressi sailaýy qarsańynda "saiasi dezinformatsiia taratty" dep aiyptap, joidy. 21 tamyz kúni keshke áleýmettik jeli jariialaǵan málimdemede akkaýnttar men toptar Facebook pen Instagram-da "úilestirilgen senimsiz aqparat", onyń ishinde saiasi materialdar taratqany" úshin joiylǵany aitylady.
Twitter áleýmettik jelisi de 21 tamyzda "Saýd Arabiiasy men Izrailge qarsy" jáne Palestina taqyrybynda iranshyl úgit-nasihat taratqan 300-ge tarta akkaýnt pen paraqshany japqanyn jariialady. Twitter áleýmettik jelide "úilestirilgen aila-sharǵy" byltyr bastalǵanyn aitady.
Facebook byltyr Resei arnaiy qyzmeti áleýmettik jelide AQSh-taǵy 2016 jylǵy prezident sailaýyna yqpal etý maqsatynda operatsiialar júrgizgenin moiyndaǵannan keiin qoldanýshylar jelisin qadaǵalap otyrý tásilderin burynǵydan kúsheitken.
Áleýmettik jeli AQSh pen Ulybritaniia úkimetin qoldanyp jatqan sharalary týraly habardar etkenin málimdegen. "Biz mundai áreketke qarsymyz, sebebi shynaiylyqtyń biz úshin máni zor. Qoldanýshylar Facebook-te kórip bilgen nársesine sene alýy tiis" dedi Facebook kompaniiasynyń jetekshisi Mark Tsýkerberg.
